Juventus dugir jafntefli gegn Spal á útivelli á morgun til að verða ítalskur meistari áttunda árið í röð. Juventus er með 20 stiga forskot á Napoli þegar sjö umferðir eru eftir af deildakeppninni.
Juventus hefur haft gríðarlega yfirburði í ítölsku úrvalsdeildinni á tímabilinu. Liðið hefur unnið 27 af 31 leik, gert þrjú jafntefli og aðeins tapað einum leik.
Spal er í 16. sæti deildarinnar með 32 stig, fjórum stigum frá fallsæti. Juventus vann fyrri leikinn gegn Spal, 2-0. Cristiano Ronaldo og Mario Mandzukic skoruðu mörkin.
Það er skammt stórra högga á milli hjá Juventus en liðið mætir Ajax í seinni leiknum í 8-liða úrslitum Meistaradeildar Evrópu á þriðjudaginn. Max Allegri, knattspyrnustjóri Juventus, gæti því brugðið á það ráð að hvíla lykilmenn í leiknum gegn Spal á morgun.
Juventus er langsigursælasta félag Ítalíu. Liðið hefur 34 sinnum orðið ítalskur meistari. Mílanó-félögin, AC Milan og Inter, koma næst þar á eftir með 18 titla hvort.
Leikur Spal og Juventus hefst klukkan 13:00 á morgun. Hann verður sýndur beint á Stöð 2 Sport 2.
Juventus dugir jafntefli á morgun til að verða meistari áttunda árið í röð
Tengdar fréttir
Ronaldo skoraði en niðurstaðan jafntefli
Ajax sló út Real Madrid og tekst þeim það sama gegn Juventus?
Var Allegri að gefa það í skyn að hann sé að fara hætta?
Getur orðið fimmfaldur Ítalíumeistari um helgina en gæti sagt skilið við Juventus í sumar.
