„Nýsköpun er hverskonar breyting sem innleidd er á vinnustað sem skapar virði“

„Myndin tengist aðgerðaáætlun um nýsköpun hjá hinu opinbera sem gefin var út í kjölfar nýsköpunarstefnu stjórnvalda,“ segir Íris Huld Christersdóttir um mynd sem fyrirtæki í atvinnulífinu geta auðveldlega nýtt sér líka , vilji þau efla nýsköpun innan teyma hjá sér til að leita nýrra sóknarfæra. 

Að sögn Írisar er ekki öllu starfsfólki alltaf ljóst í hverju nýsköpun felst og það á við bæði um starfsfólk hjá fyrirtækjum og hinu opinbera.

,,Góð mynd auðveldar þannig skilning og bætir þekkingu á viðfangsefninu. Þessi þekking er grundvöllur að stefnumótun í nýsköpun þar sem allir stjórnendur og starfsmenn þurfa að gera sér grein fyrir vídd nýsköpunar sem felur nefnilega ekki bara í sér að uppgötva nýja hluti á rannsóknarstofu heldur er nýsköpun hverskonar breyting sem innleidd er á vinnustað sem skapar virði,“ segir Íris.

Í dag mun Atvinnulífið fjalla um það í þremur greinum hvernig atvinnulífið getur mætt óvissutímum framundan með innleiðingu nýsköpunarstefnu og frumkvöðlahugsunar. Myndræn framsetning, viðhorfsbreyting og fleiri góð ráð til stjórnenda verða til umfjöllunar í dag og í fyrramálið verður til viðbótar fjallað um það hvernig stjórnir stórra félaga geta innleitt nýsköpun meira inn í sitt starf.

Íris Huld Christersdóttir er sérfræðingur í Fjármálaráðuneytinu en það ráðuneyti fer fyrir innleiðingu nýsköpunarstefnu hins opinbera. Starf Írisar felst í að innleiða þessa stefnu en áður sat hún í verkefnastjórninni sem mótaði stefnuna.

Mikilvægt að allir taki þátt

Að sögn Írisar getur einföld myndræn framsetning hjálpað mikið til við að skilgreina hvert verkefnið er og gert stjórnendum betur kleift að miðla því til starfsfólks og viðskiptavina.

„Verkefnið getur hafa verið innleitt annars staðar áður en er nýtt fyrir viðkomandi vinnustað. Við gerð nýsköpunarstefnu stjórnvalda var samráð við haghafa lykilatriði ásamt því að miðla stefnunni áfram til samfélagsins.“

En hvaða ráð myndir þú veita stjórnendum í atvinnulífinu sem vilja innleiða nýsköpunarstefnu inn í sitt starf?

„Mitt ráð til stjórnenda væri því að taka allan vinnustaðinn með í stefnumótunarferlið og miðla afurðinni skilmerkilega í kjölfarið. Með því móti næst þessi nauðsynlega þekking á hvað vinnustaðurinn þarf að gera til að vera nýskapandi og skilningur starfsfólks verður meiri. Það sem ber að varast væri að útiloka ákveðið starfsfólk sem í fyrstu “stundar enga nýsköpun,“ segir Íris.

Þá segir hún mikilvægt að allir komi að borði.

Þekking allra sem koma að starfseminni er mikilvæg til að fá inn heildarmynd af möguleikum fyrirtækja til að sækja fram sem er einmitt markmiðið með því að stunda nýsköpun,“ 

segir Íris og bætir við ,,Að bæta vinnustaðinn öllum til hagsbóta bæði fyrir eigendur, viðskiptavini og starfsfólk.“

Að sögn Írisar var þetta unnið þannig af hálfu stjórnvalda að leitað var til hagaðila „Við gerð nýsköpunarstefnu stjórnvalda var samráð við haghafa lykilatriði ásamt því að miðla stefnunni áfram til samfélagsins,“ segir Íris.

Hér má sjá umrædda myndræna framsetningu sem er ágætis dæmi um einfalda leið til að skýra út, hvert markmið og stefna er.