„Það mun standa á legsteininum sko; Kristrún frá Brúsastöðum,“ segir Kristrún Ragnarsdóttur en hún var aðeins tíu mánaða gömul þegar hún flutti að Brúsastöðum með foreldrum sínum árið 1963.
Brúsastaðir er sá bær sem næst stendur þjóðgarðinum á Þingvöllum. Í þættinum Um land allt á Stöð 2, um mannlíf í Þingvallasveit, var rætt við feðginin Ragnar Jónsson og Kristrúnu en hún er að taka við búrekstrinum af föður sínum.
Ragnar er búinn að vera bóndi á Brúsastöðum í 57 ár. Hann er frá Vestfjörðum en flutti ungur að Nesjum í Grafningi.
Okkur er sagt að hann sé aldursforseti sveitarinnar, orðinn 87 ára gamall. Núna er hann kominn með þetta forláta sexhjól sem hann notar til að sinna bústörfunum og eltast við kindur.
Þátturinn um Þingvallasveit verður endursýndur á Stöð 2 á laugardag kl. 15.45. Þáttinn má nálgast á efnisveitum Sýnar.
Hér má sjá kafla úr þættinum:
