Kostulegar sögur Villa Vill af þingmanninum kappsama

Hann hefur rekið leikmann í vinnuna, krafist þess að leikmenn æfi frá morgni til kvölds og fyrir misskilning beðið leikmann til að borða kríu. Willum Þór Þórsson er yfirvegaður þingmaður Framsóknarflokksins í dag en sögurnar af honum úr fótboltanum í gamla daga eru margar lyginni líkastar.

Vilhjálmur Hans Vilhjálmsson lögmaður spilaði um tíma með og undir stjórn Willums Þórs hjá Þrótti Reykjavík á tíunda áratugnum. Vilhjálmur sagði óborganlegar sögur af Willum í hlaðvarpinu Draumaliðið á dögunum. Sögurnar eins og Vilhjálmur man þær að minnsta kosti, svo sá fyrirvari sé settur. 

Þá rifjaði hann sömuleiðis upp þegar hann sjálfur neitaði Elton John um ókeypis kaffibolla.

Vilhjálmur rifjaði upp æfingaferð Þróttara til Hollands þar sem dvalið var í sumarhúsabyggð í um 25 kílómetra fjarlægð frá æfingavellinum, gróflega áætlað af lögmanninum.

„Gleðin var í fyrirrúmi en ekki alltaf til mikill peningur,“ segir Vilhjálmur. Stjórn Þróttar hafi ekki tekið í mál að leigja rútu til að flytja mannskapinn á æfingar.

Létt skokk, hjólatúr, tvær æfingar og einn á einn

„Við þurftum allir að leigja okkur hjól. Svo byrjaði dagurinn klukkan átta á morgnan með morgunskokki. Þá bara bankaði Willum og ræsti alla,“ segir Vilhjálmur. Willum hafi gefið í skyn að þetta væri nú bara létt skokk til að vakna.

„Þetta endaði í klukkustundarlöngu útihlaupi. Honum fannst þetta rosalega gaman,“ segir Vilhjálmur en minna var um skokkgleði hjá leikmönnum liðsins. Við tók morgunmatur og svo hjólatúr út á völl á æfingu sem hófst klukkan tíu.

Willum spilaði reglulega með á æfingum og gerði það raunar lengst af þjálfarferli sínum. Frægt er að hann þolir ekki að tapa.

„Æfingin átti það til að ílengjast þegar Willum var að tapa. Svo æfingarnar voru tveir til þrír tímar.“

Þá hafi þurft að hjóla til baka í hádegismat. Lítill tími hafi verið til að kasta mæðinni því hjólatúr var framundan út á völl á síðdegisæfinguna. Dagurinn hafi því byrjað klukkan átta og klárast fimm. Þróttararnir alltaf að.

Vilhjálmur segist hafa hangið mest með Axel Gomez, markverði Þróttar, og Þorsteini Halldórssyni sem spilaði um árabil með KR og FH og var þarna kominn í Þrótt. Í dag þjálfar Þorsteinn sem kunnugt er kvennalið Breiðabliks. Slökuðu þeir á eftir langan æfingadag.

„Svo um kvöldið kemur Willum,“ segir Vilhjálmur og ljóst að honum er skemmt að rifja upp sögurnar af hinum óþreytandi þjálfara. Hann skellir upp úr.

„Hann stillti upp tveimur stólum í stofunni og spurði: Vill einhver koma í einn á einn!“

Undirtektirnar hafi sjaldnast verið miklar enda menn gjörsamlega búnir á því. Menn hafi þó komist í hörkuform undir stjórn Willums og farið fantavel af stað á komandi tímabili. Liðið hafi þó toppað of fljótt og því fylgdu nokkrir skellir seinni hluta móts.

Jens og Hans

Þá rifjaði Vilhjálmur sömuleiðis upp eftirminnilegan viðburð í æfingaferð hjá Þrótti til Spánar þar sem ungir leikmenn voru að stimpla sig inn í hópinn. Leikmenn á borð við Björgólf Takefusa, Hall Hallsson og tvíburana leiknu Hans og Jens Sævarssyni.

„Það voru pínu átök á milli ungra og gamla, þessir ungu létu ekkert vaða yfir sig,“ segir Vilhjálmur. Kærkomið hafi verið að fá þá inn í hópinn.

Í æfingaferð hafi Willum gefið grænt ljós á eitt fríkvöld. Reynsluboltarnir Vilhjálmur, Axel, Þorsteinn og fleiri hafi áttað sig á því að ekki þýddi að fara yfir strikið í gleðinni. Því myndi fylgja refsing daginn eftir. Ungu mennirnir hafi ekki alveg þekkt þjálfarann Willum jafn vel.

Svo gaman var umrætt kvöld að í morgunmat daginn eftir sást hvorki til Jens né Hans að sögn Vilhjálms.

„Þá var Willum mjög pirraður,“ segir Vilhjálmur. Voru leikmenn sendir eftir tvíburunum sem komu niður í matsalinn.

„Jens var mjög framlágur og Willum horfir á hann og hristir hausinn. Svo segir hann við hann: Þú ert ekkert að fara á æfingu. Farðu bara og fáðu þér morgunmat og farðu svo og fáðu þér kríu.“

Jens á að hafa svarað að bragði fullum hálsi: 

„Ég er ekki að fara að éta eitthvað helvítis fuglakjöt í morgunmat!“

Blaðamaður rakst á Jens fyrir tilviljun í dag og bar söguna undir hann. Jens hafði heyrt af þessari frásögn Vilhjálms og haft gaman af. Jafnvel þótt verið væri að rugla mönnum saman, jafnvel æfingaferðum og sögurnar vel skreyttar og kryddaðar.

Rekinn í vinnuna

En það voru fleiri en ungu strákarnir sem fengu að finna fyrir Willum. Vilhjálmur rifjar upp æfingu á gamla malarvellinum í Sæviðarsundinu þar sem Þróttur var áður til hús.

Frosinn grjóthnullungavöllur að sögn Vilhjálms og Willum hafi verið pirraður. Ástæðan var sú að honum fannst leikmenn ekki vera að nýta kostinn. Frasi sem Willum er þekktur fyrir.

„Besti kosturinn var að maður átti yfirleitt að senda á hann,“ segir Vilhjálmur og skellir upp úr. Þorsteinn Halldórsson hafi í tvígang sent boltann á Willum, aðeins fyrir framan hann, sem náði ekki til boltans.

Willum hafi stöðvað æfinguna og kallað á Þorstein: „Steini, þú átt að senda í lappirnar á mér!“

Þorsteinn er ekki þekktur fyrir að láta valta yfir sig og svaraði að bragði:

„Reyndu bara að hreyfa þig, hlunkurinn þinn.“

Willum hafi ekki tekið þessu vel og rekið Steina af æfingunni: „Farðu bara heim.“

Enn átti Steini tromp á hendi og svaraði: „Ég er ekki að fara heim, ég er að fara í vinnuna.“

Willum átti lokaorðið: „Þú ert rekinn í vinnuna!“

Vilhjálmur bætir við að hann kunni svo sannarlega vel að meta Willum og hann sé eina ástæðan fyrir því að hann gæti mögulega kostið Framsóknarflokkinn. Sem honum detti þó ekki í hug að gera.

Elton John fékk ekkert kaffi

Ein kostuleg saga Vilhjálms, sem tengist þó ekki alþingismanninum Willum, er af tónleikum Elton John á Laugardalsvelli í júní 2020. Þá kom upp sprenghlægilegt mál því Þróttur átti rétt á veitingasölu á vellinum þetta sumar, skriflegan samning við KSÍ.

Vilhjálmur segir tónleikahaldara hafa verið ósátta, eðlilega enda talið sig geta haft eitthvað upp úr veitingasölu á tónleikunum. Tryggvi Geirsson, formaður aðalstjórnar Þróttar, bað Vilhjálms sem var þá aðeins laganemi að taka málið að sér fyrir félagið. Vilhjálmur segist hafa mælt með reyndari mönnum en Tryggvi þvertekið fyrir það.

„Þegar Tryggvi Geirs sagði mönnum að gera eitthvað í Þrótti þá bara gerði maður það.“

Í deilunum hafi Vilhjálmur gert lögbann á tónleikana, sem ekki varð af, en niðurstaðan var sú að Þróttur átti rétt á veitingasölunni.

Tryggvi hafi svo tilkynnt Vilhjálmi að hann yrði fulltrúi Þróttar á tónleikunum og sæi til þess að allt færi vel fram.

„Svo kemur það upp að það kemur rótari frá Elton og ætlar að ná í kaffi fyrir kallinn,“ rifjar Vilhjálmur upp. Skítakuldi var þetta júníkvöld í Laugardalnum og Elton með teppi þar sem hann sat við píanóið á útitónleikunum.

„Það var búið að brýna staffið svo mikið. Það var hringt í mig og spurt hvort það mætti gefa Elton kaffi. Ég auðvitað þvertók fyrir það og sagði að hann gæti borgað sitt kaffi eins og aðrir,“ segir Vilhjálmur skellihlæjandi.