Reykjaneshafnir hafa áhuga á að ráðast í uppbyggingu í Helguvíkurhöfn þannig að herskip geti lagt þar að höfn, og Atlantshafsbandalagið geti haft þar aðstöðu, sem tengst gæti aðstöðu þess á Keflavíkurflugvelli.
Morgunblaðið greinir frá þessu og hefur eftir Halldóri Karli Hermannssyni, hafnarstjóra Reykjaneshafna, að undirbúningsvinna hafi farið fram - þó aðeins af hálfu hafnarinnar en ekki bandalagsins. Fulltrúar þess hafi þó vissulega kannað aðstæður við höfnina.
Í Mogganum er jafnframt haft eftir hafnarstjórn að uppbygging í höfninni hefði mikilvæg efnahagsleg áhrif á svæðinu. Rósa Björk Brynjólfsdóttir, þingmaður Vinstri grænna, segir þó að framkvæmdirnar þyrftu formlegri umræðu áður en hægt yrði að aðhafast nokkuð.
