Jóhann Berg Guðmundsson fór meiddur af velli í fyrri hálfleik er Burnley og Fulham gerðu 1-1 jafntefli í ensku úrvalsdeildinni í dag.
Jóhann Berg hafði skorað í tveimur síðustu úrvalsdeildarleikjum Burnley og var í byrjunarliðinu í kvöld en fór af velli á 39. mínútu vegna meiðsla.
Staðan var markalaus í hálfleik en Ola Aina kom Fulham yfir á 49. mínútu. Sú forysta stóð þó bara í þrjár mínútur því þá hafði Ashley Barnes jafnað metin.
Liðin skiptust á að stýra leiknum það sem eftir lifði leiksins en hvorugt liðið náði að skora fleiri mörk. Lokatölur 1-1.
Þrautaganga Fulham á Turf Moor heldur því áfram. Þeir hafa ekki unnið þar í síðustu 31 tilraunum.
It's the Clarets' longest ever unbeaten run against an opponent at Turf Moor in their history. #bbcfootball #BURFUL
— Match of the Day (@BBCMOTD) February 17, 2021
Burnley er í fimmtánda sætinu með 27 stig en Fulham er í átjánda sætinu með nítján stig, sex stigum frá öruggu sæti.
