Mark Ronaldo dugði skammt gegn Hellas Verona

Óvænt úrslit urðu niðurstaðan í síðasta leik dagsins í ítölsku úrvalsdeildinni í fótbolta. Ítalíumeistarar Juventus heimsóttu þá Hellas Verona.

Portúgalska markamaskínan Cristiano Ronaldo kom Juventus í forystu snemma í síðari hálfleik.

Heimamönnum tókst að jafna metin áður en yfir lauk því Antonin Barak skoraði á 78.mínútu.

Fleiri urðu mörkin ekki og 1-1 jafntefli niðurstaðan. Juventus sjö stigum á eftir toppliði Inter Milan.

Fyrr í kvöld vann Bologna 2-0 sigur á Lazio. Andri Fannar Baldursson var ekki í leikmannahópi Bologna.