FH vann nauman sigur á Selfossi í Olís deild karla í kvöld. Skildu liðin að með einu marki 28-27.
Selfyssingar byrjuðu leikinn af krafti og komu sér í ágætisstöðu á fyrstu mínútunum.
Þegar að um 12 mínútur voru búnar af leiknum tók við kafli þar sem hvorugt liðið kom boltanum í markið. Það tók Selfoss 6 mínútur að finna markið en FH um 11 mínútur.
Eftir 22 mínútur var staðan 4-9 fyrir Selfyssingum. Hefði það ekki verið fyrir Phil Döhler markmann FH þá hefði staðan mögulega verið verri.
FH-ingar fóru að ranka við sér og skildu liðin jöfn að í hálfleik 11-11 sem var vægast sagt þvert á allar spár miðað við gengið framan af.
FH fékk líklega ágætis tiltal frá Sigurstein Arndal í hálfleik því allt annað lið mætti í seinni hálfleik.
Þeir fóru að gefa í og komu sér í þriggja marka forystu. Þegar mest lét voru þeir í fjögurra marka forystu.
Selfyssingarnir pössuðu að missa þá ekki alltof langt frá sér og skildu liðin að með einu marki í leikslok, 27-28.
Af hverju vann FH?
Þrátt fyrir arfa slaka byrjun náðu þeir sér á strik og voru bara mun seigari. Hvernig þeir náðu sér til baka er magnað og hvernig þeir mættu stemmdir í seinni hálfleikinn.
Hverjir stóðu upp úr?
Það er hægt að orða það þannig að Phil Döhler hafi unnið þennan leik fyrir FH. Hann hélt þeim inn í leiknum til að byrja með og var með 20 varða bolta, 44% markvörslu.
Atkvæðamestur í FH-liðinu var Einar Rafn Eiðsson með 9 mörk. Leonharð Þorgeir Harðarson var með 4.
Hjá Selfyssingum var Einar Sverrisson frábær með 8 mörk. Á eftir honum var Hergeir Grímsson með 7 mörk.
Vilius Rasimas var góður í markinu með 16 varða bolta, 37% markvörslu.
Hvað gekk illa?
Fyrstu 20 mínútur hjá FH gengur vægast sagt illa.
Seinni hálfleikurinn hjá Selfossi gekk brösulega og eftir að hafa komið sér í ágætis stöðu misstu þeir það niður.
Hvað gerist næst?
FH eru búnir að spila sinn leik í 16. umferð en í 17. umferð mæta þeir Stjörnunni. Sunnudaginn 28. mars kl. 19:30.
Selfoss fær ÍR í heimsókn í 16. umferð, fimmudaginn 25. mars kl. 19:30.
Halldór Jóhann Sigfússon: Við töpum á móti Phil Döhler.
Halldór Jóhann, þjálfari Selfoss í handbolta, var nokkuð sáttur með frammistöðu síns liðs þrátt fyrir tap gegn FH í kvöld.
,,Ég er að mörgu leyti ánægður með leik okkar. Það eru fyrstu tíu í seinni hálfleik sem ég er virkilega ósáttur við.“
Selfyssingar voru öflugir í byrjun leiks en FH drógu úr þeim vígtennurnar hægt og rólega og þá aðalega Phil Döhler.
,,Við töpum á móti einum manni. Við töpum á móti Phil Döhler. Hann ver hvert dauðafærið á fætur öðru og við erum með ótrúlega slaka nýtingu í dauðafærum. Það er hrikalega súrt að tapa með einu marki en það er staðreynd.“
,,Ég get ekki kvartað yfir hvað við erum að gera í leiknum. Við bara skorum ekki úr dauðafærum og það vinnur okkur,“ sagði Halldór Jóhann að lokum.
Sigursteinn: Við létum hann líta full vel út
Sigursteinn Arndal var sáttur með sigur sinna manna á Selfossi í Olís-deild karla í kvöld.
„Ég er ótrúlega lukkulegur með þetta. Ánægður með sigurinn,“ sagði Sigursteinn í leikslok.
Það er hægt að segja að enginn bjóst við að FH myndi vinna þennan leik miðað við gengi þeirra í byrjun fyrri hálfleiks þar sem þeir voru komnir með 4 mörk eftir 20. mínútur.
„Það vantaði mikið tempó og svo vantaði nátturulega bara að nýta færin. Hann stóð sig frábærlega í markinu hjá Selfyssingum en við létum hann líta full vel út.“
Sigursteinn stappaði stálinu í sína menn í hálfleik og snéri allt annað lið á völlinn í seinni hálfleik.
„Við vorum búnir að koma okkur inn í leikinn í hálfleik. Það var jafnt í hálfleik og við töluðum um að halda áfram með varnarleikinn sem við vorum búnir að vera spila í fyrri hálfleik og halda áfram tempóinu. Við vissum að við myndum stinga þá af á eitthverjum tímapunkti.“
Aðspurður út í fjarveru Jóhans Birgis og Egils sagði hann að það væru smávegis meiðsl en kom því einnig að, að það vanti nú menn á skýrslu hjá öllum liðum.
