Steph Curry með fimmtíu stiga leik en sá besti í fyrra var rekinn út úr húsi

Stephen Curry skoraði 50 stig og gaf 10 stoðsendingar að auki þegar Golden State Warriors vann 127-113 sigur á Atlanta Hawks. Curry skoraði þrettán fyrstu stig Warriors í leiknum en hann skoraði níu þriggja stiga körfur og hitti úr öllum þrettán vítaskotum sínum.

Þetta er í fyrsta sinn sem Curry nær 50 og 10 leik en aðeins Wilt Chamberlain og Rick Barry hafa náð því sem leikmenn Warriors. Hann er líka sá elsti í sögu NBA deildarinnar sem nær að vera með 50 stig og 10 stoðsendingar í sama leik.

Jordan Poole var næststigahæstur hjá Golden State en liðið vann þarna sinn fimmta leik i röð og hefur nú unnið níu af tíu leikjum sínum á tímabilinu. Trae Young var með 28 stig og 9 stoðsendingar hjá Atlanta Hawks.

Annað lið sem vann sinn fimmta leik í röð var lið Phoenix Suns sem fagnaði 109-104 útisigri á Sacramento Kings. Cameron Payne kom með 24 stig inn af bekknum, Devin Boooker var með 18 stig, 9 fráköst og 6 stoðsendingar og Chris Paul og Mikal Bridges voru báðir með sextán stig. Suns fór í lokaúrslitin en tapaði þremur af fyrstu fjórum leikjum þessa tímabils. Nú hefur liðið hins vegar rétt úr kútnum.

Þrenna LaMelo Ball dugði ekki á móti LeBron James lausu Los Angeles Lakers liði. Lakers vann 126-123 sigur á Charlotte Hornets en þurfti framlengingu. Russell Westbrook var líka með þrennu, 17 stig, 12 fráköst og 14 stoðsendingar en Anthony Davis skoraði 32 stig. Carmelo Anhtonu var með 29 stig og hitti úr 7 af 10 þriggja stiga skotum sínum. Ball var með 25 stig, 15 fráköst og 11 stoðsendingar.

DeMar DeRozan var með 28 stig og Zach LaVine bætti við 24 stigum þegar Chicago Bulls endaði fimm leikja sigurgöngu Brooklyn Nets með sannfærandi 23 stiga sigri, 118-95. Bulls liðið skoraði 42 stig í fjórða leikhlutanum sem liðið vann 42-17.

Kevin Durant gerði sitt með því að skora 38 stig í leiknum en LaMarcus Aldridge var með 19 stig á 23 mínútum. James Harden skoraði 14 stig en Blake Griffin var bara með tvö stig.

Luka Doncic skoraði 25 stig þegar Dallas Mavericks vann 108-92 sigur á New Orleans Pelicans eftir slaka byrjun. Tim Hardaway Jr. og Jalen Brunson voru báðir með 17 stig fyrir Dallas liðið sem vann sinn þriða leik í röð. Þetta var aftur á móti sjöunda tap Pelicans manna í röð en liðið er áfram án stórstjörnu sinnar Zion Williamson.

Nikola Jokic var með þrennu í 113-96 sigri Denver Nuggets á Miami Heat, 25 stig, 15 fráköst og 10 stoðsendingar, en hann var líka rekinn út úr húsi eftir ósætti við Markieff Morris. Morris braut illa á Jokic sem svarað með því að henda honum í jörðina. Báðir voru sendir í sturtu.

Jokic var valinn mikilvægasti leikmaður NBA-deildarinnar á síðustu leiktíð en hann var að þarna að ná fyrstu þrennu sinni á tímabilinu.