Frægir fundu ástina árið 2021

Fjölmargar fréttir birtast á ári hverju í tengslum við tilhugalíf þessara einstaklinga. Hér að neðan má sjá yfirferð Vísis um nokkur ástarsambönd sem blómstruðu á árinu 2021, í það minnsta um tíma, en sum samböndin gengu ekki upp.

Fjölmiðlakonan Berglind Pétursdóttir, betur þekkt sem Berglind Festival, sem slegið hefur í gegn með innslögum sínum í Vikunni með Gísla Marteini á RÚV byrjaði með Þórði Gunnarssyni en hann er hagfræðingur og blaðamaður. 

Þau Jón Trausti Reynisson og Ingibjörg Dögg Kjartansdóttir, ritstjórar Stundarinnar, eru orðin par.

„Ef það er eitthvað sem heimsfaraldrar og náttúruhamfarir kenna manni er það að hika ekki við að gera það rétta í lífinu,“ skrifaði Jón Trausti í Facebook-færslu þar sem hann greindi frá tíðindunum.

Stjörnufasteignsalinn Hannes Steindórsson og Karen Ósk Þorsteinsdóttir urðu par á árinu. Hannes er einn af eigendum fasteignasölunnar Lind og hefur Karen starfað sem flugfreyja hjá Icelandair og naglasérfræðingur.  Samkvæmt heimildum fréttastofu eru þau þó ekki saman lengur. 

Freyr Gylfason, fyrrverandi sjónvarpsstjóri Stöðvar 2 og Kolfinna Baldvinsdóttir, ritstjóri hjá HB útgáfu, tilkynntu um samband sitt á árinu

Freyr er fyrrverandi eiginmaður Ellý Ármanns, fjölmiðla- og listakonu, og eiga þau dóttur saman. Sagnfræðingurinn Kolfinna á sömuleiðis að baki starfsferil í fjölmiðlum en hefur meðal annars unnið þætti fyrir Stöð 2, ÍNN og RÚV. Hún á tvö börn og var áður gift tónlistarmanninum Birni Jörundi.

Laufey Rún Ketilsdóttir starfsmaður Sjálfstæðisflokksins og Bergþór Ólason, þingmaður Miðflokksins fundu ástina á árinu og eiga nú von á barni saman.  Laufey er 33 ára en Bergþór er 46 ára og því þrettán ára aldursmunur á þeim tveimur.

Laufey var áður aðstoðarmaður Sigríðar Andersen í dómsmálaráðuneytinu. Bergþór hefur verið þingmaður frá árinu 2017. Þau eiga bæði grunn úr starfi ungra Sjálfstæðismanna hvar Bergþór sat í stjórn um árabil. Laufey gegndi formennsku hjá SUS á árunum 2015 til 2017.

Guðmundur Hafsteinsson fjárfestir sem oft er kenndur við Google og Guðlaug Kristbjörg Kristinsdóttir, forstjóri Stekks fjárfestingafélags urðu að ofurpari. Guðmundur er í dag stjórnarformaður Icelandic Startups en hann hefur þróað vörur fyrir bæði Apple og Google.

Þá er hann forstjóri og stofnandi Fractal 5 en um er að ræða íslenskt hugbúnaðarfyrirtæki sem á dögunum sótti þriggja milljóna dala fjármögnun til bandarísks fjárfestingasjóðs. Guðlaug Kristbjörg er auk þess að vera forstjóri Stekks virk í stjórnarformennsku. Þannig er hún bæði stjórnarformaður Vírnets í Borgarnesi, Kviku eignastýringar og Securitas.

Ástin blossaði á ný hjá Eddu Falak og Kristjáni Helga glímukappa og þjálfara í Mjölni.

Edda og Kristján kynntust þegar Edda flutti til Íslands frá Kaupmannahöfn í júlí í fyrra og urðu þau þá strax ástangin. Edda var á þeim tímapunkti nýkomin úr öðru sambandi og segir hún því tímann ekki hafa verið réttan. Leiðir þeirra hafa nú legið aftur saman og gamlar glæður kviknað á ný.

Tónlistarmaðurinn og dramatúrgurinn Matthías Tryggvi Haraldsson og söng- og leikkonan Brynhildur Karlsdóttir féllu hvort fyrir öðru.

Matthías fór svo á skeljarnar í Sky lagoon eins og fjallað var um hér á Vísi.

Ástrós Traustadóttir samkvæmisdansari fann ástina á árinu og er nú komin í sambúð. 

Maðurinn sem um ræðir er Adam Karl Helgason, framkvæmdarstjóri City bikes ehf. Hann er skútuútgerðarmaður enda gerir City bikes ehf. út rafskútur undir merkjum ZOLO.

Landinn þekkir Ástrósu einna helst vegna þátttöku hennar í sjónvarpsþáttunum Allir geta dansað.

Katrín Tanja Davíðsdóttir crossfitkempa og Brooks Laich, kanadískur fyrrverandi atvinnumaður í íshokkí fundu ástina á árinu. 

Leikkonan og handritshöfundurinn Dóra Jóhannsdóttir og Egill Egilsson flugmaður opinberuðu samband sitt á árinu og trúlofuðu sig svo nokkrum mánuðum síðar. 

Knattspyrnukonan Elín Metta Jensen er komin í samband. Sá heppni er listamaðurinn Ýmir Grönvold. Elín Metta birti skemmtilega mynd af Ými á Instagram í treyju merktri Jensen. Á bakinu er einnig talan tíu, sem er númerið sem Elín Metta spilar með hjá liði Vals. Elín er miðherji Íslandsmeistara Vals og leikmaður kvennalandsliðs Íslands.

Leikstjórinn og kvikmyndagerðamaðurinn Einar Egils og tónskáldið Eydís Helena Evensen eru komin í samband. Hamingjuóskum hefur rignt yfir þau síðan þau opinberuðu sambandið.

Jóhanna Guðrún Jónsdóttir fann ástina á ný eftir skilnað snemma á árinu. Söngkonan er komin aftur í samband með sínum fyrrverandi, Ólafi Friðriki Ólafssyni. Þau eiga von á barni saman á næsta ári.