Appelsínugul viðvörun er á suðvesturhorni landsins en afar hvasst er á þessum hluta landsins. Öllum flugferðum frá Keflavíkurflugvelli í morgun var aflýst og bílar eiga sumir hverjir í basli með að komast yfir Hellisheiðina.
Nokkur úrkoma hefur verið austan Hellisheiðarinnar en snjókoma í kömbunum og versnar skyggnið svo eftir því sem vestar er farið á sjálfri heiðinni. Þar er heldur blint og samkvæmt upplýsingum fréttastofu hafa einhverjir bílar lent í basli og hafnað utan vegar.
Öllu flugi Icelandair, sem fara átti frá Keflavíkurflugvelli fyrir hádegi í dag, hefur verið aflýst vegna vonskuveðurs. Flugi Play til Tenerife og Alicante hefur sömuleiðis verið frestað um sólarhring.
Eftir stormasama helgi mun stytta upp og lægja í kvöld og nótt. Umhleypingasöm vika er þó framundan.
