Stefnir í kuldalega veiðiopnun

Veiðin hefst sem fyrr 1. apríl og er svo til öll ásóknin í sjóbirtingsveiði en nokkur vötn opna engu að síður sama dag. Þau eru að vísu mörg hver ennþá ísi lögð svo það verður líklega fátt um fína drætti þar. Þeir veiðimenn sem síðan stefna á sjóbirtingsveiðar í byrjun apríl þurfa líklega að vera við því búnir að vaða skafla eða jafnvel að koma að ám og veiðistöðum óveiðanlegum vegna íss og snjóskafla.

Það er langt síðan það hefur snjóað jafn mikið á landinu en undantekningar þó milli landshluta en núna er staðan bara þannig að það virðist alls staðar vera fannfergi. Þetta gerir það að verkum að staðan gæti orðið sú að það verður lítið hægt að veiða fyrstu dagana eða í það minnsta þangað til hægt verður að kasta flugu í flesta veiðistaðina. Það sem aftur á móti er jákvætt í þessu er að veiðitíminn gæti lengst því sjóbirtingurinn dvelur oftar en ekki lengur í ánum þegar vorið er kalt og snjóþungt. Bara svo maður reyni að finna eitthvað jákvætt í þessum vetri sem er að setja allt í kaf.