Flugbransinn: „Þú verður háður þessum bransa má segja frá degi eitt“

Sonja er með B.Sc. í fjármálaverkfræði frá Háskólanum í Reykjavík. Byrjaði starfsframann í fjármálageiranum en kynntist flugbransanum fyrst hjá WOW og nú hjá PLAY. 

Sonja er í sambúð með Hilmari Gunnarssyni en þau eiga synina Mikael Mána 11 ára og Kristófer Ísak 5 ára.

„Það snýst allt um fótbolta á mínu heimili og eru æðislegar stundir með strákunum á fótboltamótum og sjá þá dafna í því sem þeir elska.“

Eins og að missa fjölskyldumeðlim

Sonja segist alltaf hafa haft áhuga á fjármálageiranum. Stefnan var því þangað enda hafði hún starfað hjá Sparisjóði Hafnarfjarðar/BYR frá því að hún var sautján ára. Þar starfaði hún í fjárstýringu.

„Ég fer í fæðingarorlof 2011 en var svo boðið starf hjá WOW þegar eldri strákurinn minn var níu mánaða. Ég ákvað að prófa eitthvað nýtt enda tækifærið að starta flugfélagi á Íslandi var of stórt til að gera það ekki,“ segir Sonja um það þegar hún hætti í bankanum og tók flugið með WOW.

„Þessi bransi er alls ekki fyrir alla en þú þarft að læra að skipuleggja þig með það hugarfar að fara mörg skref til hliðar yfir daginn þar sem koma alltaf upp önnur verkefni sem ýta til skipulaginu. Mikilvægt að áttir þig á að það er í lagi og lærir að vinna með að skipulagið breytist hratt.“

Þegar Sonja horfir til baka á tímann hjá WOW segir hún margt koma upp í hugann. Enda hafi þetta verið skemmtilegur tími.

„Mín sérfræði kunnátta var tekjustýring en einnig með mikinn áhuga á öðrum verkefnum innan sölu og markaðssviðs. Ég varð því fljótt tengiliður tekjustýringar inn í deildir sölu- og markaðssviðs. Upplýsingaflæði er gífurlega mikilvægt í svona hröðum geira og því mikilvægt að sé góð tenging milli deilda.

En líka lærdómsríkur.

Það var gífurlega erfitt þegar WOW fór í þrot enda margir hverjir verið þarna frá upphafi og má því segja að tilfinningin var eins og að missa fjölskyldumeðlim.“

Hlustum ekki á: „Þetta hefur alltaf verið gert svona“

Eftir WOW sá Sonja fyrir sér að slaka aðeins á. Sem eftir nokkra mánuði sýndi sig að vera ekkert að ganga.

„Ég hef alltaf haft mikla orku og á erfitt með að hafa ekkert fyrir stafni.“

Aftur var stefnan tekin á fjármálageirann og réði Sonja sig í starf fjármálaráðgjafa.

Í júlí 2019 var hins vegar haft samband við hana frá PLAY.

,,Það þurfti ekki mikið til að sannfæra mig og ótrúlegt en satt ekki heldur manninn minn. Virkilega þakklát hvað hann er alltaf til staðar og styður þétt við bakið á mér enda ekkert minna álag fyrir hann að ég fari aftur í þennan bransa. Hvað þá að starta öðru flugfélagi.“

Við tóku krefjandi tímar þar sem nýju lággjaldaflugfélagi var komið á laggirnar af ótrúlega öflugu teymi að sögn Sonju.

„Sem hefur alltaf unnið sem eitt þar sem allir eru tilbúnir að hjálpast að. Enda höldum gífurlega vel utan um hvort annað.“

Sonja segir hraða einkenna bransann. Því ef ekki er hugsað hratt og út fyrir boxið, er hreinlega hætta á að missa af lestinni.

„Þetta var svo staðfest þegar faraldurinn skall á og sáum hvernig mörg önnur félög voru föst í gömlum rótgrónum legacy kerfum sem gátu ekki þróast á sama hraða og þurfti þegar faraldurinn skall á.“

Sonja segir hraðann í starfsumhverfinu einmitt vera eitt af því sem gerir starfið svo skemmtilegt. Þar sem þróunin er mikil og því alltaf verið að læra eitthvað nýtt.

Fyrir utan auðvitað öryggis- og reglugerðir þá hlustum við ekki á „þetta hefur alltaf verið gert svona“ og hefur það hjálpað okkar að koma okkur á þann stað sem erum í dag og mun byggja okkur enn meira upp í framtíðinni.“

Áskoranirnar í starfinu

Sonja segist afar stolt af því að PLAY hafi verið valið besta Startup fyrirtækið af CAPA, en CAPA velur besta startup félagið í geiranum í öllum heiminum. PLAY var valið það besta af 25 startup félögum. Þá segir hún það hafa verið mikla hvatningu þegar PLAY var tilnefnt sem vörumerki ársins af Brandr.

Margt í starfinu í dag, segir Sonja vera áherslur sem henni hefur lærst með tíð og tíma að reynist vel. Til dæmis leggur hún mikla áherslu á gott upplýsingaflæði á milli deilda. Hennar reynsla sé sú að gott upplýsingaflæði á milli deilda sé eitt af lykilatriðunum í því að byggja upp góða fyrirtækjamenningu.

„Gott upplýsingaflæði og það að allir hafa tækifæri að koma með sitt input og sínar hugmyndir gerir starfið líka skemmtilegra og teymið í heild sinni verður enn nánara.“

Sem dæmi um verkefni eða áskoranir í starfinu má nefna tekjustýringu Play sem Sonja stýrir auk fleirri deilda.

„Tekjustýringin er deild sem þarf að fylgjast grannt með samkeppninni, trendum og gera ítarlegar greiningar til að taka fljótt og örugglega ákvarðanir. Tekjustýringin ákvarðar fargjaldið á hverju einustu sæti með flóknum útreikningum í samanburði við stöðu samkeppninnar, hegðun viðskiptavinarins og stöðu brottfarar hverju sinni,“ segir Sonja og bætir við:

„Við erum því gífurlega gagnadrifinn og var frá upphafi lagt mikinn metnað í að gögn væru góð, með hraðri uppfærslu og að hafa gögn uppfærð á nokkra mínútna fresti hjálpar ekki bara tekjustýring heldur sölu- og markaðssviðs í heild til að taka góðar og áreiðanlegar ákvarðanir hratt.“

Hún segir tekjustýringuna bera ábyrgð á því að hámarka tekjur af hverju flugi fyrir sig. Þess vegna skipti svo miklu máli að fargjaldið sé rétt stillt hverju sinni.

„Að réttur verðpunktur sé stilltur út frá stöðu og hegðun viðskiptavinar, ekki of langt undir samkeppni heldur nægilega vel undir til að haldast samkeppnishæf og hámarka tekjur hverju sinni.“

En hvaða áskoranir í starfinu finnst þér erfiðast að fást við?

„Erfiðustu áskoranirnar mínar eru eflaust að ég er óþolinmóð og á ég oft erfitt með að þurfa að bíða til dæmis eftir uppfærslum eða innleiðingum á tæknilegum lausnum. PLAY er að vinna mjög hratt í tæknilegum lausnum svo klárlega er þetta mín helsta áskorun er að vera þolinmóð.“

Flug, frí og fjölskyldan

Sonja segir alltaf líf og fjör á heimilinu. Allt gangi út á fótbolta og að þær séu ófáar stundirnar sem farið hafa í fótboltamótin með sonunum. Sem sé virkilega gaman að taka þátt í.

Heimilið sé samt aðal samkomustaður fjölskyldunnar. Og reyndar stórfjölskyldunnar allrar sem verji miklum tíma saman.

„Uppáhalds tíminn er að koma heim og njóta með strákunum mínum. Eftir langan og erfiðan dag er það extra mikilvægt. Ég og maðurinn minn deilum miklum tónlistaáhuga og njótum að hlusta á góða tónlist ásamt því stunda líkamsrækt,“ segir Sonja og bætir við:

„Í þokkabót á ég vínkonuhóp sem samanstendur af ótrúlega mögnuðum og yndislegum stelpum sem gefa mér mikinn drifkraft í að gera betur alla daga. Að njóta með þeim er einn af mörgum toppum í tilverunni.“

Þá segir hún fjölskylduna auðvitað njóta góðs af því að PLAY bjóði upp á 35 áfangastaði.

„Ég veit ekkert betra en að hoppa erlendis í hitann og kúpla mig út með fjölskyldunni. Og get eiginlega ekki beðið eftir því að kíkja til Bologna á Ítalíu, Prag í Tékklandi eða Varsjá í Póllandi sem allt eru nýir áfangastaðir á þessu ári. Og auðvitað er ætlunin að fljúga til Liverpool í vetur á leik með fótboltasnillingana okkar.“

En hvaða ráð ætli Sonja laumi á, fyrir fólk sem í senn sinnir krefjandi starfi og er með stóra fjölskyldu og vinahópa að huga að?

Allir ættu að hugsa vel um sjálfan sig, þegar orkan eykst eftir góða líkamsrækt eða öndunaræfingu er mögnuð tilfinning og hjálpar þér að takast enn betur á við lífið og hvað þá í krefjandi starfi. 

Ég legg því mikið upp úr því að hreyfa mig til að halda jafnvægi andlega og líkamlega en einnig hef ég verið að læra öndunaræfingar sem er ótrúlegt tól fyrir andlegt jafnvægi.“