Það voru nýliðar Monza sem voru í heimsókn hjá Juventus og munaði aðeins stigi á liðunum í töflunni þegar kom að leik dagsins þar sem Juventus fékk fimmtán mínusstig á dögunum og því í tólfta sæti deildarinnar.
Gestirnir frá Monza voru mun skilvirkari í sínum sóknarleik og skoruðu fyrsta mark sitt í leiknum strax eftir tíu mínútur en við nánari skoðun var markið dæmt af.
Á átjándu mínútu náðu gestirnir forystunni með marki Patrick Ciurria og skömmu fyrir leikhlé tvöfaldaði Dany Mota forystuna fyrir gestina.
Þó leikmenn á borð við Arek Milik og Dusan Vlahovic hafi komið inn af varamannabekk Juventus tókst liðinu ekki að skora og urðu lokatölur því 0-2 fyrir Monza.
Monza lyfti sér þar með upp fyrir Juventus í töflunni, situr í ellefta sæti á meðan Juventus er í þrettánda sæti en þó níu stigum frá fallsvæðinu.
