Íbúafundurinn hófst í Laugardalshöll klukkan 17 og stóð í hálfan þriðja tíma. Þar kröfðust íbúar Grindavíkur aðgerða og sumir lýstu því yfir að íbúar yrðu leystir úr erfiðri stöðu með því að vera keyptir út úr fasteignum sínum.
Hilmar sagði að í stað þess að spurningum hefði verið svarað á fundinum hefðu margar nýjar spurningar vaknað.
„Eins og með skólamálin eða leigustyrkinn,“ segir Hilmar en hann var gestur í Bítinu á Bylgjunni í morgun.
Hann sagðist ánægður að ríkisstjórnin ætli að fara sömu leið með lífeyrissjóðslán og bankalán íbúða. Þá sitji allir jafnir sem séu með íbúðalán og að fyrir þau sem séu með lífeyrissjóðslán, eins og hann sjálfur, sé það mikill léttir. Ólíkt bönkunum hafa lífeyrissjóðir ekki fallist á að setja íbúðalán Grindvíkinga á ís.
Hilmar sagðist ekki hafa heyrt neitt annað nýtt á fundinum og telur að stjórnmálafólkið hefði getað komið betur undirbúið á fundinn. Katrín Jakobsdóttir, Þórdís Kolbrún Reykfjörð Gylfadóttir og Sigurður Ingi Jóhannsdóttir voru fulltrúar ríkisstjórnarinnar á fundinum sem var vel sóttur.
„Þetta er auðvitað ný atburðarás, þetta gerðist bara á sunnudaginn. En samt sem áður erum við búin að hafa, við fórum í rýmingu 10. nóvember. Við erum búin að hafa rúmlega tvo mánuði,“ sagði Hilmar.
Galið að greiða förgunarkostnað
Hvað varðar Náttúruhamfaratryggingasjóð sagði hann ljóst að það þyrfti að breyta reglum sjóðsins. Það væri ekki sanngjarnt að fólk þyrfti að greiða átta til tólf prósent í förgunarkostnað.
„Það kemur ekki til greina. Það er galið,“ sagði Hilmar og að hann sæi ekki fyrir sér að geta tekið pening út úr sínu húsi til að kaupa eða byggja nýtt miðað við stöðuna í dag. Hann tók undir hugmyndir þingmanna Sjálfstæðisflokksins Vilhjálms Árnasonar og Óla Björns Kárasonar um að ríkið kaupi Grindvíkinga út og eigi svo við Náttúruhamfaratryggingasjóð, í stað íbúa.
„Ég held að það sé góð lausn fyrir marga og maður heyrði það eftir fundinn sérstaklega að það er það sem fólk vill sérstaklega núna. Eftir þennan viðburð á sunnudaginn. Það vill bara komast í burtu.“
Hann sagði það ömurlega tilfinningu að vita að mögulega verði ekki hægt að búa í bænum næstu ár eða mánuði.
„Óvissan er algjör og það er ekkert hægt að ímynda sér þetta. Maður sefur varla. Ég veit ekki einu sinni hvar maður á eftir að búa.“
Sárast að missa samfélagið
Spurður um hugmyndir um að byggja ný heimili á lóð í Reykjanesbæ tók Hilmir vel í það en sagðist ekki endilega eiga efni á því að byggja sjálfur. Hann sagði dóttur sína í skóla þar og að honum litist vel á að þar yrði gerð byggð fyrir Grindvíkinga.
„Það er samfélagið og það er það sem er sárast að missa.“
Hvað varðar skólamálin sagði hann að Grindvíkingum vantaði skýrari svör. Börnin væru í fjórum safnskólum og dreifð. Eins með leigutorgið. Það væri illa skipulagt og virkaði ekki nægilega vel.
Hann tók undir orð Bryndísar Guðlaugsdóttur, fyrrverandi borgarfulltrúa í Grindavík á íbúafundinum í gær um að hafa hugsað um það að betra væri að húsið færi undir hraun. Sérstaklega hvað varðar skilyrði Náttúruhamfaratryggingasjóðs. Þá væri enginn vafi á því að það ætti að bæta það.
„Maður er svo hræddur núna um að maður þurfi núna að fara að taka einhvern slag við Náttúruhamfarasjóð,“ sagði Hilmar.
Hægt er að hlusta á viðtalið í heild sinni hér að ofan.
