Tískutal er fastur liður á Vísi þar sem rætt er við ólíka einstaklinga um þeirra persónulega stíl og hvernig tíska nýtist þeim í daglegu lífi. Klæðaburður er sannarlega fjölbreytt listform en við fáum að skyggnast inn í ólíka fataskápa og fræðast nánar um það merkilega tjáningarform sem tíska er fyrir hverjum og einum viðmælanda.
Hvað finnst þér skemmtilegast við tískuna?
Það er fátt sem fyllir mig af jafn miklum innblæstri og tíska, það er líklega það skemmtilegasta. Tíska er svo áhugaverð leið til að tjá sig og sömuleiðis til að kynnast karakter fólks betur.
Það er virkilega gaman sjá hvernig aðrir nálgast klæðaburð allt öðruvísi en maður sjálfur sem jafnvel breytir því hvernig maður hugsar um tísku.
Hver er uppáhalds flíkin þín og af hverju?
Þær eru margar en í augnablikinu er það Second Hand Kenzo gallajakki sem tengdamamma mín gaf mér en hún keypti hann fyrir 35 árum í París. Ég var búin að vera leita af hinum fullkomna gallajakka í nokkur ár núna en fann aldrei neinn þar til ég fékk þennan gullmola í hendurnar.
Hann er í sérstöku uppáhaldi bæði vegna sögunnar á bak við hann en líka því hann er svo skemmtilegur í sniðinu.
Eyðirðu miklum tíma í að velja föt hverju sinni?
Dagsdaglega þá alls ekki, frekar eyði ég miklum tíma í að ákveða hvaða fötum ég fjárfesti í. Hins vegar er sagan önnur ef ég er að velja föt fyrir sérstakt tilefni, þá tek ég mér góðan tíma og jafnvel ofhugsa valið.
Hvernig myndirðu lýsa stílnum þínum?
Ég myndi lýsa honum sem kvenlegum og rómantískum með „sporty“ ívafi, án þess þó að reyna að hljóma of háfleyg.
Hefur stíllinn þinn breyst mikið í gegnum tíðina og hvernig þá?
Algjörlega! Þegar ég var unglingur fókusaði ég meira á magn yfir gæði og fylgdi kannski frekar tískubylgjum. Ég hugsaði ekki um fataskápinn minn heildstætt, frekar hvað heillaði mig að hverju sinni.
Í dag er það öfugt og ég reyni að versla mér einungis flíkur sem ég sé fram á að munu endast, eru úr góðum efnum og ég get notað mikið. Sömuleiðis legg ég mun meiri áherslu á að kaupa notaðar flíkur en áður.
Nýturðu þess að klæða þig upp?
Mér finnst fátt skemmtilegra en að klæða mig upp.
Hvaðan sækirðu innblástur í tískunni?
Ég myndi segja að konurnar í lífi mínu veita mér lang mestan innblástur. Ég umgengst svo mikið af ótrúlega flottum og mismunandi konum sem ég lít upp til og elska að draga innblástur frá.
Þar á eftir verð ég að segja að ég sæki líka innblástur frá samfélagsmiðlunum Instagram og TikTok þar sem ég fylgist með uppáhalds fastamerkjunum mínum og second hand sölusíðum eins og Regn, Depop o.fl.
Ertu með einhver boð og bönn þegar það kemur að klæðaburði?
Ég á almennt mjög erfitt með það ef fólk er að skipta sér af því hvernig aðrir klæða sig, afhverju er fólki ekki sama? Leyfðu bara öðrum að njóta lífsins og klæða sig nákvæmlega eins og það vill.
Mín boð og bönn snúa kannski aðallega að neysluvenjum, bara það að reyna fara sem best með fötin sín og frekar að láta gera við flíkur en að fyrsti kostur sé að henda þeim.
Hver er eftirminnilegasta flík sem þú hefur klæðst og af hverju?
Það mun vera bláa Foxy Saks Potts kápan mín fagra, ég trú varla enn að hún sé mín! Hún var á óskalistanum í mörg ár en hún var alltaf of dýr fyrir mig þar til ég fann hana á lygilegum afslætti og þá var ekki aftur snúið.
Býrðu yfir einhverju góðu ráði þegar það kemur að tísku?
Mitt helsta ráð er að þora og ekki hlusta á gagnrýni frá fólki sem lifir ekki þínu lífi. Tíska og klæðaburður er ekki svona alvarlegt, maður á bara að hafa gaman að tískunni og njóta þess að klæða sig eins og maður vill.
Hér má fylgjast með Mariane Sól á samfélagsmiðlinum Instagram.
