Tískutal er fastur liður á Vísi þar sem rætt er við ólíka einstaklinga um þeirra persónulega stíl og hvernig tíska nýtist þeim í daglegu lífi. Klæðaburður er sannarlega fjölbreytt listform en við fáum að skyggnast inn í ólíka fataskápa og fræðast nánar um það merkilega tjáningarform sem tíska er fyrir hverjum og einum viðmælanda.
Hvað finnst þér skemmtilegast við tískuna?
Mér finnst gaman að sjá oft hvað hún getur verið óútreiknanleg.
Ég fylgist ekki beint með hvað er það heitasta hverju sinni en maður tekur eftir því þegar ákveðin snið eða mynstur og hvað eina sem manni fannst vera hallærislegt fyrir korteri vera allt í einu töff.
Þá stendur maður stundum sjálfan sig að því að reyna verða sér út um hlutinn og finnast hann nauðsynleg og spennandi viðbót í fataskápinn, en það er auðvitað ekki alltaf gefið eftir.
Hver er uppáhalds flíkin þín og af hverju?
Það er lopapeysa sem mamma prjónaði. Hún er ekki dæmigerð í sniðinu heldur stutt með frekar vítt hálsmál og útvíðar ermar. Ég tengi peysuna við góðar tilfinningar og sumarið. Þegar ég pakka henni í ferðatöskuna þá veit ég að það eru góðar stundir framundan.
Eyðirðu miklum tíma í að velja föt hverju sinni?
Nei ég myndi ekki segja það dagsdaglega. Ég pæli reyndar alveg fram i tímann ef það eru tilefni framundan þá finnst mér gott að vera búin að ákveða dressið.
Þá svona aðallega til þess að forðast það að enda með hálfan fataskápinn á víð og dreif um herbergið og „ekkert til að fara í“ korter í mætingu.
Hvernig myndirðu lýsa stílnum þínum?
Ætli hann sé ekki dæmigerður skandí stíll með smá rómantísku ívafi. Ég er mikið fyrir grófa blúndu, falleg mynstur og á mögulega fullmikið af röndóttum flíkum. Ég er líka algjör kjólakona og þá aðallega svona spari og erlendis.
Ég hafði extra gaman af því að klæðast kjólum á meðgöngunum mínum og naut mín í botn. Sérstaklega þegar kúlan var farin að vera sýnileg.
Hefur stíllinn þinn breyst mikið í gegnum tíðina og hvernig þá?
Já ætli það ekki, ég myndi segja að það fari bara eftir hvaða tímabili ég er stödd í hverju sinni. Ég hef verið tveimur löngum fæðingarorlofum síðastliðin ár og metnaðurinn og tími sem fer í að spá í klæðunum hjá mér ekki alveg i forgangi.
Ég hlakka því mikið til þess að bæta úr því og finna stílinn minn aftur nú þegar ég fer að vinna.
Nýturðu þess að klæða þig upp?
Já, ég hef gaman að því og hlakka yfirleitt til þess þegar það eru einhver tilefni. Það er góð tilbreyting frá mömmugallanum eða æfingar- og útivistarfötunum.
Hvaðan sækirðu innblástur í tískunni?
Ég verð að segja að það eru mikið af smart konum hér heima sem eru duglegar að setja inn á Instagram og hafa einhver áhrif a mig.
Einnig hjá vinkonum mínum og á ferðalögum.
Ég hef mjög gaman að því að fylgjast með fólki í stórborgum og sjá hvernig klæðaburðurinn er allskonar. Ég fór til Parísar síðasta sumar og þar fannst mér konurnar upp til hópa svo smart og það virðist svo áreynslulaust sem mér finnst mjög heillandi.
Einn af uppáhalds Instagram reikningum sem ég hef gaman að er „whatpeoplearewearing“ á Instagram. Þar fær maður smjörþefinn af því hvernig fólk er að klæða sig út i heimi, mæli með.
Ertu með einhver boð og bönn þegar það kemur að klæðaburði?
Nei alls ekki.
Mér finnst skemmtilegt að sjá þegar fólk klæðir sig eftir eigin tilfinningu og líðan. Mér finnst það skína í gegn þegar fólki líður vel í fötunum sem það klæðist, það fylgir því ákveðin útgeislun.
Hver er eftirminnilegasta flík sem þú hefur klæðst og af hverju?
Ætli það sé ekki gamla góða eldrauða 66°Norður úlpan mín með hvítum loðkraga sem eg átti á unglingastigi og var mikið notuð.
Þetta var fyrsta flíkin sem ég safnaði sjálf fyrir og ég man mjög vel eftir því þegar ég fór og keypti hana stolt.
Býrðu yfir einhverju góðu ráði þegar það kemur að tísku?
Ég hef reynt að tileinka mér síðustu ár að vera meðvitaðri um eigin neyslu og vanda valið. Það forðar manni oft frá skyndikaupum og óþarfa bruðli.
Hér má fylgjast með Ingunni Ýr á samfélagsmiðlinum Instagram.
