Bjarki Már Elísson, leikmaður Veszprém, skoraði þrjú mörk þegar ungverska liðið, sem nýlega fagnaði heimsmeistaratitli félagsliða, lagði Dinamo Búkarest með tólf mörkum, 36-24. Haukur Þrastarson leikur með Dinamo og skoraði eitt mark í leiknum.
Þá stóð Viktor Gísli Hallgrímsson milli stanganna hjá pólsku meisturunum í Wisla Plock þegar liðið tapaði sínum fjórða leik í röð í Meistaradeildinni. Liðið tapaði með einu marki gegn Füchse Berlin, 25-24. Viktor varð átta skot í leiknum, eða 26 prósent af þeim skotum sem rötuðu á rammann.
Wisla er eins og áður sagði án sigurs í A-riðli Meistaradeildarinnar en staðan í riðlinum er mjög afgerandi tvískipt. Efstu fimm liðin eru öll með þrjá sigra í fjórum leikjum, en Sporting trónir þó á toppnum með sjö stig, þar sem liðið er með eitt jafntefli.
Á botninum eru svo þrjú lið, RK Eurofarm Pelister með eitt stig eftir jafntefli, og Wisla og Frederica Handboldklub, bæði án stiga en danska liðið er með neikvæða markatölu upp á 41 mark og vermir því botnsætið í riðlinum.
