Wolverhampton Wanderers og Crystal Palace skildu jöfn, 2-2, í 10. umferð ensku úrvalsdeildarinnar. Wolves er því enn sigurlaust og í neðsta sæti, Palace situr í því sautjánda með sjö stig.
Þrátt fyrir fjölda færa í fyrri hálfleik stóðu mörkin á sér. Wolves byrjaði vel og skapaði hættu við mark gestanna en þeir stóðu það af sér og fóru svo að skapa eitthvað sjálfir.
Palace fékk tvö dauðafæri í röð en miðjumennirnir Will Hughes og Daichi Kamada skutu báðir framhjá eftir fyrirgjafir frá Ismaila Sarr. Jean-Philippe Mateta fékk hættulegasta færi fyrri hálfleiks en þrumaði boltanum óvart í liðsfélaga sinn, sem var rangstæður.
Eftir markalausan en galopinn fyrri hálfleik hélt fjörið áfram í seinni.
Wolves byrjaði á því að klúðra dauðafæri, Pablo Sarabia slapp einn í gegn en þrumaði boltanum í andlit markmannsins, sem lá nokkuð lengi eftir en hélt svo leik áfram.
Fjögur mörk á tæpum tuttugu mínútum
Palace sneri vörn í sókn og skoraði opnunarmarkið á 59. mínútu eftir fyrirgjöf sem José Sá, markmaður Wolves, ætlaði að grípa en Jörgen Strand-Larsen skallaði, hann reyndi að bægja boltanum burt en hitti beint á Trevor Chalobah sem tók vel við og skoraði í autt net.
Strand-Larsen var ekki lengi að bæta upp fyrir þau mistök og breyta Chalobah úr hetju í skúrk.
Boltanum var skipt yfir til vinstri, Chalobah misreiknaði og missti af honum, Matheus Cunha keyrði inn á völlinn, þræddi í gegn á Strand-Larsen og hann kláraði færið.
Joao Gomes kom Úlfunum svo yfir aðeins fimm mínútum síðar. Matheus Cunha byrjaði sóknina með góðu hlaupi upp miðjan völlinn, lagði boltann til hægri á Goncalo Guedes sem fann Joao Gomes og hann kláraði auðvelt færi örugglega.
Palace jafnaði leikinn aftur á 77. mínútu. Markið kom upp úr hornspyrnu sem Daichi Kamada fleytti áfram á fjærstöngina, þar lúrði Marc Guéhi og lagði boltann í netið.
Bæði lið við botninn og sættust á stigið
Eftir stórfjörugan kafla og fjögur mörk róaðist leikurinn töluvert, lítið eftir á tanknum hjá báðum liðum.
Palace kom boltanum þó í netið rétt áður en lokaflautið gall, markið fékk hins vegar ekki að standa þar sem brotið var á José Sá, markmanni Wolves, í aðdragandanum.
2-2 jafntefli varð niðurstaðan. Wolves hefur ekki enn unnið leik og situr í neðsta sæti deildarinnar eftir tíu leiki. Crystal Palace hefur safnað sjö stigum og situr í 17. sæti.
