Fjölmiðlar í Ísrael segja líklegt að vopnahléstillaga sem liggur fyrir verði samþykkt.
Times of Israel sagði frá því að ísraelski herinn hefði varað íbúa um tuttugu bygginga í úthverfi í sunnanverðri Beirút, þar sem ítök Hezbollah hafa verið mikil í gegnum tíðina.
Ísraelski herinn sagði svo í kjölfarið að árásir hefðu verið gerðar með átta orrustuþotum á sjö byggingar þar sem vígamenn Hezbollah eiga að hafa geymt og sýslað með peninga. Þrettán hús sem sprengjum var einnig varpað á eiga að hafa verið notuð sem vopnageymslur, stjórnstöðvar og annað.
Herinn birti meðfylgjandi drónamyndband af árásunum í dag. Myndbandið sýnir hvernig sprengjum var varpað á tuttugu skotmörk á um tveimur mínútum.
Í stuttu og einföldu máli sagt snýr tillagan að því að Ísraelar hörfi frá suðurhluta Líbanon og að vígamenn Hezbollah geri það einnig á allt að sextíu dögum. Sá hluti landsins er markaður af Litaniá.
Sjá einnig: Ísrael og Hezbollah sögð við það að gera vopnahlé
Ísraelar hafa lengi kvartað yfir því að ályktun öryggisráðs Sameinuðu þjóðanna frá 2006, sem meinaði vígamönnum Hezbollah eða öðrum vígamönnum að halda til suður af Litaniá í Líbanon, hafi ekki verið framfylgt. Eingöngu líbanski herinn og friðargæsluliðar áttu að mega vera á svæðinu samkvæmt ályktuninni en meðlimir Hezbollah hafa lengi byggt göng og neðanjarðarbyrgi á svæðinu og hafa skotið eldflaugum að Ísrael þaðan.
Í suðurhluta Líbanon eru ísraelskir hermenn nú komnir að Litaniá og er það í fyrsta sinn, síðan hermenn réðust fyrst inn í Líbanon fyrr í haust.
The IDF's 91st Division has reached the Litani River in the eastern sector of southern Lebanon, as well as the Wadi Saluki area, where the military says troops located dozens of Hezbollah weapons and sites.
— Emanuel (Mannie) Fabian (@manniefabian) November 26, 2024
In Wadi Saluki, troops of the Commando Brigade raided several Hezbollah… pic.twitter.com/btQ7goBPbS
Varnarmálaráðherra hótar árásum
Israel Katz, varnarmálaráðherra Ísrael, hét því í dag að verði vopnahlé samþykkt muni Ísraelar ekki veigra sér við því að grípa til aðgerða, verði þeir varir við Hezbollah-liða suður af Litaniá. Þetta sagði hann við erindreka Sameinuðu þjóðanna.
Katz sagði að hvert hús sem hýsti hryðjuverkamenn yrði jafnað við jörðu og loftárásir yrðu gerðar á Hezbollah-liða á svæðinu. Hann sagði að Ísraelar myndu hafa enga þolinmæði fyrir brotum gegn vopnahléinu.
Þá krafðist hann frekari aðgerða friðargæsluliða Sameinuðu þjóðanna á svæðinu, sem kallast UNIFIL. Þeir hefðu engan veginn komið í veg fyrir að Hezbollah-liðar starfi í suðurhluta Líbanon.
Forsvarsmenn UNIFIL segja þá ekki eiga að koma í veg fyrir Það sé verkefni hersins að gera það. Her Líbanon er hins vegar langt frá því að vera jafn öflugur og Hezbollah-samtökin.
Þúsundir liggja í valnum og rúm milljón á vergangi
Ísraelar og Hezbollah, sem njóta stuðnings klerkastjórnar Íran, hafa lengi eldað grátt silfur saman. Átökin þeirra á milli náðu nýjum hæðum þegar Hezbollah-liðar hófu eldflaugaárásir sínar á Ísrael þann 8. október, eftir að Ísraelar hófu árásir á Gasaströndina. Um sextíu þúsund Ísraelar hafa þurft að flýja heimili sín vegna þessara árása.
Ísraelar hafa gert umfangsmiklar og mannskæðar loftárásir í Líbanon og gerðu innrás í ríkið fyrr í haust, með því yfirlýsta markmiði að reka Hezbollah-liða frá suðurhluta Líbanon.
Að minnsta kosti 3.500 manns liggja í valnum eftir árásir Ísraela í Líbanon, samkvæmt yfirvöldum þar, og rúm milljón manna hafa þurft að flýja heimili sín.