Um helgina hefur verið fjallað um hugmyndir um að fresta landsfundi Sjálfstæðisflokksins, sem fyrirhugaður er í lok febrúar. Meðal ástæðna sem nefndar hafa verið er möguleikinn á slæmri færð á þeim tíma árs, með tilheyrandi vandræðum fyrir flokksmenn á landsbyggðinni.
Oddný Björk Daníelsdóttir er formaður sjálfstæðisfélagsins Skjaldar á Seyðisfirði. Hún segir litlu máli skipta, með tilliti til veðurs, hvenær fundur fari fram.
„Hérna frá Seyðisfirði getur alveg verið ófært yfir Fjarðarheiðina eins og í júní eða í febrúar,“ segir Oddný Björk.
Gera ráðstafanir ef í harðbakkann slær
Oddný segir að Sjálfstæðismenn á Austurlandi muni mæta á fundinn með öll sín sæti.
„Við lesum bara í veðrið og leggjum þá bara fyrr af stað eða gerum ráð fyrir að vera lengur á leiðinni.“

Oddný gerir ráð fyrir því að fundurinn verði um mánaðamótin febrúar/mars, líkt og lagt var upp með.
„Og ætla bara að bóka flug og hótel eftir áramótin og mæta.“
Tvær dagsetningar hafi komið til greina þegar blásið var til landsfundar. Lok febrúar 2025 eða lok nóvember á þessu ári.
„Það er eitthvað annað sem býr að baki en veðrið. Ég veit ekki til þess að það hafi verið rætt við fólk sem býr hvað lengst frá höfuðborgarsvæðinu, hvað okkur þætti um þessar dagsetningar,“ segir Oddný Björk.
Vert er að taka fram að fleira en veður hefur verið nefnt í því samhengi að heppilegt sé að fresta fundinum. Nýkjörinn þingmaður Sjálfstæðisflokksins, Jens Garðar Helgason, sagði til að mynda um helgina að tímasetning fundarins hefði verið valin með það í huga að fara fram í aðdraganda prófkjöra og svo alþingiskosninga, sem blásið var til fyrr en fullt kjörtímabil gerði ráð fyrir.
Jón Gunnarsson, fyrrverandi þingmaður og ráðherra flokksins, kvaddi sér hins vegar hljóðs í gær og sagði tillögu um frestun eðlilega, sér í lagi í ljósi þess hvernig veður og vindar geti látið í febrúar. Gagnrýnendur tillögunnar væru aðeins af höfuðborgarsvæðinu. Mikilvægt væri að fólk kæmist klakklaust á fundinn, og bað Jón fólk um að spara stóru orðin.
Engin ástæða til að halda fund í febrúar
Elliði Vignisson, bæjarstjóri Sjálfstæðismanna í Ölfusi, er á öndverðum meiði við Oddnýju og telur frestun rétta, svo fundurinn megi snúast um sveitarstjórnarkosningar í maí 2026. Veðrið spili þó einnig inn í.
„Fyrir fólk á landsbyggðinni þá er febrúar auðvitað ekki jafn heppilegur til fundarhalds í Reykjavík og til dæmis í maí,“ segir Elliði.
Honum þyki broslegt þegar þingmenn af höfuðborgarsvæðinu geri lítið úr því sjónarmiði.
Sú sé þó ekki raunin í tilfelli Oddnýjar á Seyðisfirði, en Elliði segist að sjálfsögðu bera virðingu fyrir sjónarmiðum þeirra sem telji að landsfund þurfi sem fyrst, til að bregðast við þeirri staðreynd að flokkurinn hafi hlotið sína lökustu kosningu í sögunni í afstöðnum þingkosningum, og dúsi nú í stjórnarandstöðu í fyrsta sinn frá árinu 2013.
Sjá einnig: Spennan magnast fyrir fundi sem óvænt á að fresta
„Ég veit það líka að auðvitað myndum við landsbyggðarmenn bíta á jaxlinn og mæta á fund í febrúar ef til hans verður boðað. En ég sé engin rök hníga til þess að það sé eitthvað krísuástand sem við þurfum að taka þessar ákvarðanir í.“
Sveitarstjórnarmálin fái meira rými
„Að mörgu leyti finnst mér betra að fá ákveðið bil á milli þingkosninga og landsfundar. Að við áttum okkur á stöðunni, sjáum nýtt fólk virka í starfi og höfum allan tímann fyrir okkur,“ segir Elliði.

Líkt og áður sagði er það skoðun Elliða að sveitarstjórnarmálin eigi að fá mikið vægi á næsta landsfundi.
„Bakbeinið í Sjálfstæðisflokknum eru sveitarstjórnarmálin. Við erum með 113 kjörna fulltrúa í 35 sveitarfélögum. Við erum í meirihluta í 24 sveitarfélögum og hreinan meirihluta í sjö. Það eru 500 manns starfandi í sveitarstjórnum um allt land. Það er alveg kominn tími til þess að flokkurinn veiti sveitarstjórnarmálum það svigrúm sem þau þurfa. Við eigum ekki að skirrast við það í aðdraganda sveitarstjórnarskosninga að láta landsfundinn okkar snúast um þau.