Fyrsta formlega æfing alls liðsins var í Víkinni í dag þar sem byrjað var á fundi með þjálfarateyminu og farið vel yfir skipulagið fram að móti. Átján leikmenn eru í íslenska hópnum en handboltamaður ársins 2024, Ómar Ingi Magnússon, er ekki með vegna meiðsla.
Fyrsti leikur Íslands á HM er við Grænhöfðaeyjar fimmtudaginn 16. janúar og strákarnir okkar spila svo við Kúbu 18. janúar og við Sloveníu 20. janúar. Allir leikirnir hefjast klukkan 19:30 að íslenskum tíma. Þrjú efstu liðin komast svo áfram í milliriðil með þremur liðum úr H-riðli (Króatía, Egyptaland, Argentína, Barein). Allir leikir Íslands fara fram í Zagreb í Króatíu.
HM-hópur Íslands 2025
Markverðir:
- Björgvin Páll Gústavsson, Valur 273 leikir/24 mörk
- Viktor Gísli Hallgrímsson, Wista Plock 60/1
Aðrir leikmenn:
- Arnar Freyr Arnarsson, Melsungen 100/101
- Aron Pálmarsson, Veszprém 177/674
- Bjarki Már Elísson, Veszprém 118/401
- Einar Þorsteinn Ólafsson, Fredericia 14/5
- Elliði Snær Viðarsson, Gummersbach 50/109
- Elvar Örn Jónsson, Melsungen 79/183
- Gísli Þorgeir Kristjánsson, Magdeburg 60/139
- Haukur Þrastarson, Dinamo Búkarest 35/50
- Janus Daði Smárason, Pick Szeged 86/146
- Óðinn Ríkharðsson, Kadetten Scaffhausen 42/130
- Orri Freyr Þorkelsson, Sporting 16/41
- Sigvaldi Björn Guðjónsson, Kolstad 76/214
- Teitur Örn Einarsson, Gummersbach, 36/36
- Þorsteinn Leó Gunnarsson, Porto 5/10
- Viggó Kristjánsson, Leipzig 59/165
- Ýmir Örn Gíslason, Göppingen 92/36
Íslenska liðið mun æfa saman á Íslandi fram að hádegi 8. janúar en ferðast svo þann dag með Icelandair til Kaupmannahafnar, og þaðan til Kristianstad í Svíþjóð. Þar spilar liðið við sterkt lið Svía 9. janúar og svo annan vináttulandsleik við Svía í Malmö 11. janúar.
Þann 13. janúar fer íslenska liðið svo til Zagreb til lokaundirbúnings fyrir HM.
Öflugt teymi Vísis og Stöðvar 2 fylgir íslenska landsliðinu á HM og fjallar ítarlega um strákana okkar allt mótið.
