Síðan Rúben Amorim tók við sem þjálfari Man United hefur heldur betur gengið brösuglega. Eftir tap gegn Brighton & Hove Albion fyrir skemmstu tók þjálfarinn reiði sína út á sjónvarpi.
Amorim hefur sjálfur sagt að það muni taka leikmenn liðsins tíma að venjast leikstíl hans og þá er ljóst að liðið þarf nokkra nýja leikmenn sem henta téðum leikstíl. Sem stendur virðist hins vegar sem liðið sé eingöngu að losa leikmenn, er það vegna slæmrar stöðu félagsins þegar kemur að FFP- og PSR-fjárhagsreglum.
Marcus Rashford er eins og allur knattspyrnuheimurinn veit til sölu, Antony er svo gott sem búinn að ganga frá lánskiptum til Real Betis og þá virðist Alejandro Garnacho vera falur fyrir rétt verð.
The Athletic greinir frá að hirslur Man United séu engan veginn tómar en ekki sé um að ræða eigið fé heldur fjármagn frá Sir Jim Ratcliffe, minnihluta eiganda félagsins, sem er eyrnamerkt nýju æfingasvæði og svo skammtímalánum sem þarf á endanum að borga til baka.
Í grein The Athletic um fjárhagsstöðu félagsins segir einnig að félagið eigi enn eftir að borga 319 milljónir punda (55 milljarða íslenskra króna) fyrir leikmenn sem það hefur nú þegar fest kaup á. Þar af eru 154 milljónir punda (27 milljarðar) sem þarf að greiða á þessu ári.
Opið bréf forráðamanna félagsins til The 1958, einna af stuðningsmannasamtökum félagsins, staðfestir frétt The Athletic. Í bréfinu segir að félagið þurfi að taka erfiðar ákvarðanir eftir að hafa tapað alls 300 milljónum punda – 52 milljörðum íslenskra króna – á síðustu þremur árum.
We are sure have all seen the news today.
— The 1958 (@The__1958) January 23, 2025
We will always be open and transparent with ourselves and everyone else. We will not hide behind any sense of entitlement. Our values, transparency and integrity will always be paramount to us and what guides us to protect generational… pic.twitter.com/QQn0SGFPBH
„Þeir eru að lifa Meistaradeildar-lífstíl á Evrópudeildar-innkomu,“ segir Kieran Maguire, sérfræðingur í fjármálum fótboltafélaga, í viðtali við The Athletic.
Það fer ekkert á milli mála að Man United hefur verið illa rekið síðan Glazier-fjölskyldan keypti félagið árið 2005. Þangað til hann hætti hélt Sir Alex Ferguson liðinu þó í hæstu hæðum ásamt hjálp David Gill sem var framkvæmdastjóri félagsins. Gill hætti á sama tíma og síðan þá hefur liðið aldrei náð sömu hæðum þrátt fyrir að eyða ótrúlegum upphæðum í leikmenn.
Ef til vill er staðan í dag áfellisdómur á Erik ten Hag, þjálfara liðsins á undan Amorim, og þeim sem sáu um leikmannkaup liðsins þá enda fékk hann fjölmarga leikmenn til félagsins. Margir hverjir kostuðu alltof mikið miðað við það sem þeir hafa sýnt á vellinum.
Tímabilið 2022-23
Nafn – Keyptur frá – Verð í milljónum evra
- Antony – Ajax – 95
- Casemiro – Real Madríd – 70,65
- Lisandro Martínez – Ajax – 57,5
- Tyrell Malacia – Feyenoord – 15
- Wout Weghorst – Burnley (á láni) – 3
- Martin Dúbravka – Newcastle United (á láni) – 2,5
- Christian Eriksen – Brentford – Frítt
- Marcel Sabitzer - Bayern München (á láni) – Frítt
- Jack Butland – Crystal Palace (á láni) – Frítt
Tímabilið 2023-24
- Rasmus Höjlund – Atlanta – 74
- Mason Mount – Chelsea – 64
- André Onana – Inter – 50
- Sofyan Amrabat – Fiorentina (á láni) – 9
- Altay Bayındır – Fenerbahçe – 5
Tímabilið 2024-25
- Leny Yoro – Lille – 62
- Manuel Ugarte – París Saint-Germain – 50
- Matthijs de Ligt – Bayern – 45
- Joshua Zirkzee – Bologna – 42,5
- Noussair Mazroui – Bayern – 15
Eftir eyðsluna hér að ofan sem og aukinn kostnað við viðbætur á Old Trafford sem og Carrington-æfingasvæðinu, sem hefði fyrir lifandi löngu átt að vera búið að ráðsat í, situr Amorim með heldur tómlegt veski.
Það virðist sem Portúgalinn hafi ekki það fjármagn sem þarf til að uppfæra leikmannahópinn. Það segir ef til vill allt sem segja þarf að leikmaðurinn sem er hvað mest orðaður við Rauðu djöflanna er tvítugur Dani að nafni Patrick Dorgu. Sá spilar vinstri vængbakvörð fyrir Lecce á Ítalíu.
Amorim þarf því að halda ró sinni þar sem leikmannahópur hans mun ekki taka stakkaskiptum á næstunni nema honum taksit að selja þeim mun fleiri leikmenn úr núverandi hópi. Það jákvæða er að Man Utd hefur eflaust ekki efni á að reka hann þó það gangi illa.
