Láttu rétta fólkið taka eftir þér í vinnunni

Sumt fólk leggur reyndar áherslu á að láta taka vel eftir sér í vinnunni líka. Og tekst það vel upp. En ekkert endilega þannig að „rétta“ fólkið sé að taka eftir því.

Að láta verkin tala eða að láta fullt af fólki taka eftir þér í vinnunni, án þess að vera endilega „rétta“ fólkið, getur hins vegar hvoru tveggja verið algjörlega röng nálgun fyrir fólk sem stefnir langt í starfsframa.

Að minnsta kosti að sögn Lorraine K. Lee, höfundar bókarinnar Unforgettable Presence; Get Seen, Gain Influence and Catapult Your Career. Bók sem þó nokkuð af erlendum miðlum hafa verið að skrifa um undanfarið.

Lee talar þar af eigin reynslu. Því sjálf flokkaðist hún eitt sinn í þann hóp að leggja fyrst og fremst áherslu á að vinna vel og vera dugleg.

Vinna að mikilvægum verkefnum.

Og vera góður liðsmaður: Vel liðin af samstarfsfélögum.

Fyrir sitt litla líf gat hún samt ekki skilið, hvers vegna ekkert gekk í að fá stöðuhækkun. Starfsframinn virtist hvorki fara aftur á bak né áfram, sama hversu dugleg hún var.

Sem Lee segir einfaldlega skýrast af því að hún lét ekki taka eftir sér sem líklegan leiðtoga.

Bókinni er lýst sem kennslubók fyrir metnaðarfullt fólk sem vill ná langt í starfi. En um bókina segir:

„Það er ekki lengur nóg að vera frábær í starfi. Samkeppnisumhverfið í dag er einfaldlega þannig að fólk sem vill ná langt í starfsframa verður að huga bæði að því hvernig og hvar það er, ef það vill láta taka eftir sér fyrir stærri stöður.“

Sem Lee segist þekkja af eigin raun. Því sjálf fór hún frá því að vera duglegur en feiminn sérfræðingur sem upplifði starfsframann staðnaðan, yfir í að verða eftirsóttur fyrirlesari, rithöfundur og ráðgjafi fyrir mörg af 500 stærstu fyrirtækjum heims.

Nú getur hver og einn velt því fyrir sér, hvort eitthvað af ofangreindu sé mögulega eitthvað sem fólk vill íhuga fyrir sig og sinn starfsframa:

Hvort nálgunin þeirra sé rétt, eða hvort starfsframinn virki staðnaður þótt metnaðurinn sé svo sannarlega til staðar.

Eitt af því sem Lee hefur sagt að sé ágætis íhugun fyrir fólk er að velta fyrir sér:

Hvað segir fólk um þig, þegar þú ert ekki nálægt?

„Það sem fólk segir þá, er vörumerkið þitt. Því hvort sem þú hefur unnið að því að byggja þig upp meðvitað eða ómeðvitað sem vörumerki, erum við öll ákveðin vörumerki; Vörumerkið er þá það orðspor sem við höfum á okkur.“