Fótbolti

Tíu leikir í röð án sigurs: Stelpunum okkar ekki gengið svona illa síðan um alda­mótin

Ágúst Orri Arnarson skrifar
Sveindís Jane og Karólína Lea voru hvorugar fæddar þegar Íslandi gekk síðast svona illa.
Sveindís Jane og Karólína Lea voru hvorugar fæddar þegar Íslandi gekk síðast svona illa. vísir / anton brink

Ísland tapaði gegn Frakklandi í gær og hefur nú farið tíu leiki í röð án sigurs, sem hefur ekki gerst síðan um aldamótin. 

Í síðustu tíu leikjum hefur Ísland tapað fimm og gert fimm jafntefli. Sigurlausa hrinan hófst í Bandaríkjunum í október 2024, landsliðið hefur ekki unnið leik í tæpt ár, síðan í júlí á síðasta ári. 

Ísland fór í gegnum heila Þjóðadeildarkeppni á þessu ári án sigurs, safnaði fjórum stigum með jafnteflum gegn Noregi og Sviss en tapaði leikjunum tveimur gegn Frakklandi.

Síðustu ellefu leikir Íslands: 

  • 16.07.2024 / Pólland - Ísland 0-1 (Síðasti sigur)
  • 24.10.2024 / Bandaríkin - Ísland 3-1
  • 27.10.2024 / Bandaríkin - Ísland 3-1
  • 29.11.2024 / Ísland - Kanada 0-0
  • 02.12.2024 / Ísland - Danmörk 0-2
  • 21.02.2025 / Sviss - Ísland 0-0
  • 25.02.2025 / Frakkland - Ísland 3-2
  • 04.04.2025 / Ísland - Noregur 1-1
  • 08.04.2025 / Ísland - Sviss 3-3
  • 30.05.2025 / Noregur - Ísland 1-1
  • 03.06.2025 / Ísland - Frakkland 0-2

Íslandi hefur tvisvar áður farið tíu landsleiki eða meira í röð án sigurs. Frá 28. júní 1996 til 30. ágúst 1997 tapaði liðið níu leikjum og gerði eitt jafntefli. Lengsta sigurlausa hrinan varð svo frá 8. maí 1998 til 21. september árið 2000, þegar liðið fór fimmtán leiki án sigurs með fimm jafnteflum og tíu töpum.

Frá aldamótum hefur Ísland aldrei spilað meira en sex leiki í röð án sigurs. Ísland átti slæmt ár árið 2004 og tapaði öllum leikjum, sex í röð, en sigur skilaði sér svo í næsta leik árið 2005.

Sex leikja sigurlaus hrina tók svo aftur við árið 2017 þegar Ísland tapaði tveimur og gerði eitt jafntefli í vináttuleikjum fyrir EM, þar sem liðið tapaði öllum þremur leikjunum. Betur gekk í sigurlausu leikjunum sex árið 2018 en þá náði Ísland fjórum jafnteflum.

Síðan 2018 hafði Ísland aldrei spilað meira en þrjá leiki í röð án sigurs, fyrr en tíu leikja sigurlausa hrinan hófst í október 2024.

Ísland fær tækifæri til að rétta úr gengi sínu í æfingaleik gegn Serbíu, áður en liðið hefur leik á Evrópumótinu í Sviss í byrjun júlí. Þar verður Ísland í riðli með Frakklandi, Finnlandi og Sviss.




Fleiri fréttir

Sjá meira


×