Innlent

Neitaði að borga fyrir leigu­bílinn og braut rúðu í lög­reglu­bíl

Atli Ísleifsson skrifar
Nú í morgunsárið gista sjö manns fangageymslur lögreglunnar á höfuðborgarsvæðinu vegna rannsóknar mála.
Nú í morgunsárið gista sjö manns fangageymslur lögreglunnar á höfuðborgarsvæðinu vegna rannsóknar mála. Vísir/Vilhelm

Lögregla á höfuðborgarsvæðinu handtók í nótt mann eftir að hafa brotið rúðu í lögreglubíl. Lögregla var kölluð til og hafði afskipti af manninum þar sem hann hafði neitað að greiða fyrir leigubíl en reikningurinn hljóðaði upp á nokkra tugi þúsunda.

Þetta kemur fram í tilkynningu frá lögreglunni á höfuðborgarsvæðinu þar sem segir frá verkefnum gærkvöldsins og næturinnar. Ekki er tekið fram hvar atvikið átti sér stað nema það hafi verið á svæði lögreglustöðvar 3 sem nær til Kópavogs og Breiðholts.

Á sama svæði var lögregla kölluð út vegna hóps drengja sem hafði veist að eldri manni. Einn drengjanna var færður á lögreglustöð og var Barnavernd tilkynnt um málið.

Nú í morgunsárið gista sjö manns fangageymslur vegna rannsóknar mála og voru 75 mál skráð í kerfum lögreglu frá klukkan 17 í gær til fimm í morgun.

Lögregla var einnig kölluð út vegna nokkurra þjófnaðarmála í matvöruverslunum í miðborg Reykjavíkur og þá voru tveir færðir í fangageymslu vegna líkamsárásarmáls á svæði lögreglustöðvar 4 sem nær til Grafarvogs, Árbæjar og Mosfellsbæjar.

Lögreglumál Reykjavík

Mest lesið


Fleiri fréttir

Sjá meira


×

Mest lesið