Ökumenn virðast ekki hafa gætt nægilega vel að sér í umferðinni í dag því óvenju mikið hefur verið um umferðaróhöpp þrátt fyrir að aðstæður til aksturs væru góðar. Sex umferðaróhöpp og eitt umferðarslys voru tilkynnt til lögreglu milli klukkan þrjú og sex. Ekið var á ellefu ára barn á gatnamótum Sæbrautar og Dalbrautar en meiðsl þess voru lítilsháttar.
Að sögn vakthafandi varðstjóra útskýra aðstæður ekki hvers vegna svona mikið var um umferðaróhöpp. Hálku var ekki fyrir að fara og flest umferðaróhöppin urðu á ágætlega upplýstum stöðum.
Hér er aðeins um að ræða þau umferðaróhöpp sem voru tilkynnt til lögreglu og því mögulegt að fleiri umferðaróhöpp hafi átt sér stað en ökumenn í þeim tilfellum sjálfir fyllt út tjónaskýrslur.
