Paul Jewell, stjóri Wigan, ætlar ekki að erfa það við kollega sinn Jose Mourinho hjá Chelsea þó hann hafi blásið út í fjölmiðlum eftir leik liðanna á dögunum, þar sem Mourinho kallaði einn leikmanna Wigan svindlara og á yfir höfði sér stóra sekt frá knattspyrnusambandinu fyrir vikið.
"Mourinho hefur tiltölulega gott vald á enskri tungu, en ég held að menn séu að taka það úr samhengi þegar hann kallar menn svindlara. Ég held hann hafi meira verið að tala um íþróttamannslega framkomu og þetta atvik hefur verið blásið óþarflega mikið upp í fjölmiðlum. Ég reyndi að fara til hans og ræða við hann eftir leikinn, en rétt missti af honum. Þetta mál er smámál af minni hálfu og ég er reiðubúinn að skrifa sambandinu bréf um að þetta sé ekkert mál að minni hálfu, ef þess er óskað," sagði Jewell.
