Kviknaði í út frá potti á Húsavík

Slökkvilið Húsavíkur var kallað að fjölbýlishúsi í bænum á áttunda tímanum í kvöld. Kviknað hafði í eldhúsinnréttingu út frá potti og var talsverður reykur. Lítill eldur reyndist vera í íbúðinni, en nokkrar skemmdir eru urðu vegna reyks og sóts. Sameign hússins slapp þó nær alveg við skemmdir.

Eldurinn læsti sig í innréttinguna beint fyrir ofan pottinn. Húsráðandi var kominn út og beið hann slökkviliðs fyrir utan íbúðina þegar það kom á staðinn. Hann var ekki talinn hafa orðið fyrir reykeitrun en var þó fluttur á heilbrigðisstofnun Þingeyinga.