Mætir Hamilton Schumacher í keppni?

Svo gæti farið að breska ungstirnið Lewis Hamilton fái tækifæri til að reyna sig gegn goðsögninni Michael Schumacher eftir allt saman. Stofnandi kappakstursins árlega, Race of Champions, segir báða kappa hafa tekið vel í að taka þátt í keppninni næsta vetur.

Keppnin verður haldin á Wembley í Lundúnum í fyrsta sinn þann 16. desember næstkomandi og þar leiða árlega saman hesta sína bestu kappaksturshetjur heimsins úr t.d. ralli og Formúlu 1. Schumacher hefur þegar staðfest að hann muni taka þátt í keppninni í ár í fyrsta sinn síðan árið 2004, en enn hefur ekki fengið staðfest hvort maðurinn sem kallaður hefur verið arftaki hans í Formúlunni - Hamilton - fær að taka þátt. Hamilton sjálfur er sagður taka vel í hugmyndina en forráðamenn McLaren vilja heldur að hann einbeiti sér að Formúlu 1.