Ekki er útilokað að Tiger Woods muni keppa í golfi á ný síðar í þessum mánuði eftir langa fjarveru vegna meiðsla.
Woods keppti síðast á opna bandaríska meistaramótinu sem hann sigraði á þó svo að hann ætti við erfið meiðsli að stríða og væri greinilega kvalinn.
Hann ætlar sér að taka eitt mót fyrir í einu og sjá til.
„Best væri að koma aftur án nokkurra vandkvæða og keppa á hverju einasta móti," sagði Woods. „En þar sem við hjónin eigum von á öðru barni ætla ég að taka eitt mót fyrir í einu."
Woods sagði enn fremur að endurhæfingin sín eftir aðgerð sem hann gekkst undir á hné hafi gengið vel.
„Ég get beitt mér á fullu á æfingum og er þetta bara spurning um að koma mér aftur í leikform. Margir hafa líka spurt mig hvort sveiflan mín hafi eitthvað breyst eftir allt saman en svo er ekki."
Hann sagði enn fremur að sér liði miklu betur eftir aðgerðina og að það væri góð tilfinning að geta beitt sér án þess að finna fyrir meiðslunum.
Woods stefnir fyrst og fremst að keppa á Masters-mótinu í apríl næstkomandi. Það eru líkur á því að hann keppi á móti í Tucson síðar í mánuðinum en þó líklegra ekki fyrr en á móti í Miami í næsta mánuði.
Tiger gæti keppt síðar í mánuðinum
