Stjarnan og Keflavík minnkuðu bæði forskot KR í tvö stig á toppi Iceland Express deildar karla í körfubolta eftir heimasigri í kvöld. Stjarnan vann 80-71 sigur á ÍR en Keflavík burstaði botnlið FSu með 40 stigum, 136-96.
Stjörnumenn virtust ætla að vinna öruggan sigur í upphafi leiks en liðið var 28-16 yfir eftir fyrsta leikhlutann. ÍR-ingar gáfust þó ekki upp það munaði aðeins fjórum stigum í hálfleik (44-40) og ÍR-liðið komst síðan yfir í fjórða leikhlutanum. Stjörnumenn voru hinsvegar sterkari í lokin og unnu níu stiga sigur, 80-71.
Justin Shouse átti enn einn stórleikinn með Stjörnunni en hann skoraði 31 stig, tók 7 fráköst og gaf 8 stoðsendingar. Nýi maðurinn Djorde Pantelic var einnig sterkur með 16 stig og 15 fráköst en hann var með 10 stig og 7 fráköst í fyrsta leikhlutanum.
Sigur Keflvíkinga á FSu var mjög öruggur, liðið var komið 31-16 yfir eftir fyrsta leikhluta og leiddi með 28 stigum í hálfleik, 65-37. Keflvíkingar skoruðu á endanum 136 stig og unnu 40 stiga sigur, 136-96.
Þrír Keflvíkingar skoruðu yfir 20 stig í leiknum og aðrir þrír til viðbótar komust í tveggja stafa tölu. Liðið náði því að skora 30 stig eða meira í öllum fjórum leikhlutunum.
Úrslit og stigaskorarar í þessum tveimur leikjum:
Stjarnan-ÍR 80-71 (44-40)
Stig Stjörnunnar: Justin Shouse 31, Djorde Pantelic 16, Fannar Freyr Helgason 15, Jovan Zdravevski 10, Ólafur Jónas Sigurðsson 4, Kjartan Atli Kjartansson 2, Guðjón Lárusson 2.
Stig ÍR: Michael Jefferson 19, Nemanja Sovic 16, Eiríkur Önundarson 9, Kristinn Jónasson 7, Ásgeir Örn Hlöðversson 6, Davíð Þór Fritzson 5, Steinar Arason 4, Ólafur Þórisson 3, Elvar Guðmundsson 2.
Keflavík-FSu 136-96 (65-37)
Stig Keflavíkur: Hörður Axel Vilhjálmsson 24, Draelon Burns 20, Sigurður Gunnar Þorsteinsson 20, Gunnar Einarsson 16, Uruele Igbavboa 14, Þröstur Leó Jóhannsson 12, Gunnar H. Stefánsson 9, Andri Þór Skúlason 7, Sverrir Þór Sverrisson 6, Davíð Þór Jónsson 5, Guðmundur Auðunn Gunnarsson 3.
Stig FSu: Richard Williams 35, Aleksas Zimnickas 26, Cristopher Caird 17, Kjartan Kárason 8, Orri Jónsson 5, Daníel Kolbeinsson 3, Jake Wyatt 2.
Stjarnan og Keflavík minnkuðu forskot KR á toppnum
