Pippen á meðal þekktra gjaldþrota NBA leikmanna

Deila eigenda og samtaka leikmanna í NBA deildinni í körfuknattleik virðist engan endi ætla að taka. Samningafundir hafa engu skilað og búið er að fresta keppni til 15. desember og útlit fyrir að deilan leysist ekki fyrr en eftir áramót. NBA leikmenn eru flestir á ofurlaunum en það vekur athygli að 60% fyrrum NBA leikmanna lenda í fjárhagsvændræðum 5 árum eftir að ferli þeirra lýkur. Margir þekktir kappar hafa lent í fjárhagsvandræðum eftir að ferli þeirra og má þar nefna Scottie Pippen – fyrrum leikmann meistaraliðs Chicago Bulls.

Það eru margar ástæður fyrir því að leikmenn verða gjaldþrota eftir að ferli þeirra lýkur. Slæmar ráðleggingar í fjárfestingum er ein þeirra, svik umboðsmanna og lögfræðinga eru einnig þekktar stærðir en flestir leikmenn hafa einfaldlega sóað öllum sínum penginum í tóma vitleysu.

Scottie Pippen, einn besti leikmaður NBA deildarinnar frá upphafi lék stórt hlutverk í ofurliði Chicago Bulls þar sem hann og Michael Jordan voru aðalmennirnir. Hann var tekinn inn í frægðarhöll NBA árið 2001 en Pippen varð NBA meistari alls 6 sinnum og er hann eini leikmaðurinn sem hefur náð því að vinna tvívegis Ólympíugull og NBA meistaratitil á sama tímabilinu. Pippen er einn fjögurra leikmanna Bulls sem hafa fengið keppnistreyju sína hengda upp í rjáfur á heimavelli félagsins og verður númerið 33 aldrei notað aftur af leikmanni Bulls.

Pippen valdi sér slæma ráðgjafa þegar kom að fjármálum. Hann tapaði um 14 milljörðum kr., öllu sem hann átti, og fór hann í mál gegn fyrrum ráðgjöfum sínum. Pippen vann það mál og náði hann um 250 milljónum kr. til baka. Á meðal fjárfestinga sem Pippen hefur eflaust séð eftir er kaup hans á einkaþotu sem kostaði um 500 milljónir kr. Þotan var kyrrset vegna skulda aðeins einum mánuði eftir að hann keypti þotuna.

Antoine Walker - tapaði öllu vegna spilafíknar

Walker var í meistaraliði Miami Heat árið 2006 og var þar áður lykilmaður í Boston Celtics. Walker lék í 15 ár í NBA deildinni en hann tapaði öllu vegna spilafíknar. Talið er að hann hafi tapað um 13 milljörðum kr. Walker hefur reynt að komast að hjá atvinnumannaliði á ný en hann var handtekinn árið 2009 eftir að hann reyndi að borga um 94 milljóna kr. spilaskuld í Las Vegas með ávísun sem reyndist vera „gúmmítékki". Í maí árið 2010 var Walker lýstur gjaldþrota. Hann átti þá húseign í Miami sem er metin á 240 milljónir kr. en á húsinu hvíldu skuldir upp á 480 milljónir kr.

Latrell Sprewell - 12 milljarðar kr. í tekjur á ferlinum

Fáir hafa vakið eins mikla athygli fyrir „fjárhagslega heimsku". Sprewell var hörkuleikmaður en hann komst fyrst í fréttirnar þegar hann reyndi að kyrkja þjálfara sinn P.J. Carlesimo hjá Golden State Warriors árið 1997. Í kjölfarið fékk hann 68 leikja bann, án launa. Sprewell lék m.a. með New York Knicks og er talið að hann hafi fengið um 12 milljarða kr. í tekjur á ferlinum. Ferli hans lauk þegar hann hafnaði þriggja ára samningi við Minnesota Timberwolves upp á 3,5 milljarða kr. Sprewell sagði að upphæðin væri ekki nógu há. „Ég þarf að sjá fyrir fjölskyldu," var eitt af gullkornið sem datt af vörum Sprewell þegar hann útskýrði ákvörðun sína að hafna samningnum. Árið 2007 var Sprewell atvinnulaus, ekkert lið hafði áhuga á honum. Og smátt og smátt missti hann flestar eignir sínar vegna skulda

Kenny Anderson - dýr skilnaður varð honum að falli

Örvhenti bakvörðurinn náði að öngla saman um 7 milljörðum kr. á ferlinum en hann lék með 9 liðum. Þar á meðal Boston Celtics og New Jersey Nets þar sem saga hans hófst í NBA. Einkalíf Anderson er skrautlegt. Hann hefur þrisvar gengið í hjónaband og fyrsti skilnaðurinn reyndist dýr. Anderson náði aldrei tökum á eyðslu sinni og þegar ferli hans lauk voru fjárhagslegar skuldbindingar hans um 5milljónir kr. á mánuði og réði hann ekki við það og var lýstur gjaldþrota.

Derrick Coleman - gjaldþrota þrátt fyrir 10 milljarðar kr. tekjur

Coleman gat á góðum degi verið einn besti leikmaður NBA deildarinnar þegar hann nennti að reima skóna. Honum var líkt við Charles Barkley þegar hann var valinn af New Jersey Nets árið 1990 í háskólavalinu. Örhventur hávaxinn framherji með mikla skot – og boltaækni. Coleman náði aldrei að gera það sem ætlast var til af honum. Hann var yfirleitt of þungur og áfengisvandamál fylgdu honum eins og skugginn. Á 15 ára tímabili í NBA deildinni fékk Coleman um 10,5 milljarða kr. í tekjur. Það er allt saman farið og í mars árið 2010 var Coleman gjaldþrota og skuldaði þar að auki um hálfan milljarð kr. og voru kröfuhafarnir um 100.