Þegar farið er yfir viðskiptafréttir á Vísi árið 2013 kennir ýmissa grasa, enda eru viðfangsefnin af ólíkum toga. iPhone, Facebook og aðrar tækninýjungar voru til að mynda mjög áberandi með reglulegu millibili allt árið.
Fréttir af þyngri málum líkt og Icesave, Al Thani-málinu og skuldaleiðréttingunni, vöktu vitanlega mikla athygli og snerist umræðan að miklu leyti um þau.
Hér má sjá nokkrar viðskiptatengdar fréttir sem vöktu athygli á árinu:
Um miðjan júlí var fjallað um eiganda Super Carrier skipsins í tölvuleiknum EVE Online, sem er eitt sjaldgæfasta sinnar tegundar í leiknum. Fararskjótinn var metinn á átta til níu þúsund dollara, jafnvirði meira en einni milljón íslenskra króna. Vinur eigandans leiddi hann í gildru og tortímdi skipinu. Í fréttinni má sjá myndband af árásinni.
Reiknaðu skuldaleiðréttinguna þína hér
Í síðustu viku sagði Vísir frá því að hagfræðingurinn Þröstur Sveinbjörnsson hefði sett upp reiknivél sem reiknar niðurfærslu verðtryggðra lána samkvæmt tillögum ríkisstjórnarinnar.
Lýsir skæru ljósi ef hann kemst í snertingu við nauðgunarlyf
Í byrjun maí birtist frétt um að sex nemendur við Háskólann í Reykjavík væru að vinna að þróun lítils kubbs úr plasti sem átti að lýsa skæru ljósi kæmist hann í snertingu við nauðgunarlyf. Yfir fimm þúsund lesendur voru ánægðir með fréttirnar af kubbnum. „Kubburinn er á stærð við ísmola og við höfum sett okkur í samband við fjölda skemmtistaða sem hafa lýst yfir áhuga. Kubbnum er svo skellt í drykkinn og lætur hann þig vita ef einhverju er laumað í glasið þitt,“ sagði Jón Ragnar Jónsson, einn nemendanna sem unnu að þróuninni, í samtali við Vísi síðasta vor.
Fyrsta fréttin af niðurstöðu Icesave-málsins vakti, eins og gefur að skilja, mikla athygli. Hátt í þrjúþúsund manns líkuðu við fréttina en dómur í málinu féll 28. janúar. Fréttin sú var aðeins fyrsta af mörgum og ítarlegum um niðurstöðu Icesave-málsins. Í gegnum Twitter síðu Vísis mátti fylgjast með viðbrögðum fólks um allan heim.
Al-Thani málið: Þungir fangelsisdómar yfir Kaupþingsmönnum
Dómur í Al-Thani málinu svokallaða var kveðinn upp 12. desember síðastliðinn. Ákærðu fengu þunga dóma. Hreiðar Már Sigurðsson, forstjóri Kaupþings, var til að mynda dæmdur í fimm og hálfs árs fangelsi. Í dómsorði var meðal annars tekið fram að ákærðu ættu sér engar málsbætur. Þessi frétt var sú fyrsta um dóminn en Vísir fylgdi málinu eftir allan daginn.
Ekki lengur popp og kók í Sambíóum
Þau tíðindi að Sambíóin hygðust selja gosdrykki frá Ölgerðinni, og þar með hætta að selja kók, vöktu athygli. Ölgerðin Egill Skallagrímsson og Sambíóin hófu samstarf 1. nóvember og Vísir fjallaði um málið samdægurs. Í fréttinni segir að samkvæmt tilkynningu frá fyrirtækjunum sé um sögulegan atburð að ræða þar sem gos frá Ölgerðinni hafi ekki verið selt í Sambíóum í um 30 ár.
Spurningaleikurinn Quiz Up náði miklum vinsældum undir lok árs og um miðjan nóvember sagði Vísir frá að yfir milljón manns hefðu náð í leikinn á aðeins átta dögum.
iPhone 5 hægvirkastur
Það vakti mikla athygli í júní að iPhone 5 væri hægvirkastur snjallsíma á markaðnum. Þetta var niðurstaða neytendakönnunar bresku neytendasamtakanna Which?. Síminn hafnaði í sjöunda og síðasta sæti. Í fréttinni segir að aðdáendur Apple verði vafalaust fyrir vonbrigðum, en Samsung Galaxy S4 hafi mælst hraðasti snjallsíminn.
Útgáfa nýs iPhone í haust vakti athygli og fréttir af nýju símunum voru mikið lesnar. Fréttin; Nýr iPhone eftir tvær vikur – hægt að skipta gamla símanum upp í nýjan vakti mikla eftirtekt, sem og fréttin iPhone 5c og 5s kynntir til leiks.
Það þótti áhugavert þegar Facebook breytti ,Like‘ takkanum sem og fréttin um að Facebook ætlaði að rukka fyrir skilaboð.
