Valsmenn halda áfram að missa reynslumikla bakverði úr kvennaliðinu sínu en Ólína Guðbjörg Viðarsdóttir skrifaði í dag undir samning við Fylki eins og kemur fram á fótbolti.net.
Ólína Guðbjörg Viðarsdóttir hefur spilað með Val í eitt og hálf ár síðan að hún kom heim úr atvinnumennsku en hún tilkynnti á dögunum að hún gæfi ekki lengur kost á sér í íslenska landsliðið.
Ólína var með 4 mörk í 15 leikjum með Valsliðinu í Pepsi-deild kvenna í sumar en Valskonur enduðu í 7. sæti og hafa aldrei verið neðar. Valsliðið missti á dögunum landsliðskonuna Hallberu Guðnýju Gísladóttur í Breiðablik.
Fylkiskonur slógu í gegn á sínu fyrsta ári í deildinni, náðu 5. sæti í deildinni og féllu út í vítakeppni í undanúrslitum bikarsins.
„Ég er ótrúlega ánægð með þetta. Ég heillaðist af metnaðinum og kraftinum sem ég fann hérna og langaði rosalega mikið að taka þátt í því," sagði Ólína í samtali við blaðamann fótbolta.net sem fékk að vera viðstaddur þegar Ólína skrifaði undir samninginn í dag.
Ólína Guðbjörg var ekki lengi að hugsa sig um þegar Fylkismenn höfðu samband en Jörundur Áki Sveinsson mun þjálfa liðið og Þóra Björg Helgadóttir aðstoðar hann.
„Þetta var ákveðið á einum degi. Þegar ég heyrði í þjálfurunum, stjórninni og ráðinu þá sannfærðist ég strax. Ég er mjög spennt fyrir þessu," sagði Ólína í fyrrnefndu viðtali á fótbolta.net.
Ólína yfirgefur Val eins og Hallbera
