Birna Kristín Kristjánsdóttir, hin bráðefnilega frjálsíþróttastúlka úr Breiðabliki, gerði sér lítið fyrir og vann 60 metra hlaup kvenna á Meistaramóti Íslands innanhúss sem fram fór í Laugardalshöll um helgina.
Birna er fædd árið 2002 og er því á fimmtánda aldursári en hún kom í mark á 7,88 sekúndum, fjórum þúsundustu á undan Andreu Torfadóttur úr FH sem kom í mark á sama tíma, sjónarmun á eftir Birnu. Í þriðja sæti var María Rún Gunnlaugsdóttir á 7,92 sekúndum.
Birna er, þrátt fyrir mjög ungan aldur, ekki yngsti Íslandsmeistarinn innanhúss frá upphafi samkvæmt útreikningum frjálsíþróttasambandsins. Geirlaug Geirlaugsdóttir úr Ármanni varð Íslandsmeistari á 14. aldursári en það er einmitt móðir Birnu Kristínar.
Birna hefur verið að láta vita af sér á síðustu dögum og er hún ein skærasta stjarna innanhússtímabilsins til þessa. Á stórmóti ÍR á dögunum vann þessi unga stúlka 60 metra hlaupið, 60 metra grindahlaupið og langstökkið.
Hún keppti einnig í langstökki í Höllinni um helgina en komst ekki í úrslitin. Engu að síður frábær árangur að vera orðinn Íslandsmeistari fyrir fimmtán ára aldurinn.
Bara mamma Birnu Kristínar hefur gert betur en dóttirin
Tengdar fréttir
Meistaramótinu lokið | Myndir
Keppni á Meistaramóti Íslands í frjálsum íþróttum innanhúss lauk í dag.
Fjórar efnilegar frjálsíþróttastelpur í Íslandsmetaham um helgina
Fjórar stórefnilegar frjálsíþróttastelpur settu allar Íslandsmet í sínum aldursflokki á Stórmóti ÍR í frjálsum íþróttum um helgina. Fyrrum Ungfrú Ísland var ein þeirra sem missti Íslandmet.
