Sjö manns gistu fangageymslur lögreglunnar á höfuðborgarsvæðinu vegna ýmissa mála í nótt. Ölvaður ökumaður reyndi að hrista lögreglumenn af sér og þrír einstaklingar gistu fangageymslur þar sem þeir voru ósjálfbjarga vegna ölvunar.
Töluverður erill var hjá lögreglunni í gærkvöldi að því er segir í dagbók hennar. Þeir sem gistu fangageymslur voru þar meðal annars vegna nytjastuldar á bifreið, ráns, líkamsárásar og þjófnaðar.
Ölvaði ökumaðurinn reyndi að komast undan afskiptum lögreglu, fyrst á bifreið sinni og því næst á fótum. Hann var þrátt fyrir flóttatilraunir sínar handsamaður af lögreglumönnum, færður á lögreglustöð og loks leystur úr haldi að frumrannsókn lokinni.
Þá var bifreið ekið út af vegi á Reykjanesbraut nærri Hafnarfirði. Engin slys urðu á fólki. Einnig var ökumaður handtekinn fyrir akstur undir áhrifum fíkniefna.
Rán, líkamsárás og nytjastuldur á jólanótt
