Hross sturluðust úr hræðslu í Grímsnesi vegna hávaða frá flugvél sem flaug þar yfir í gærkvöldi. Aflífa þurfti eitt þeirra eftir að það hljóp á girðingu og slasaðist.
Nína Haraldsdóttir á bænum Minni-Bæ í Grímsnesi segir ástandið um klukkan 20 í gærkvöldi, þegar flugvélin flaug yfir, hafa verið rosalegt.
„Við höfum aldrei heyrt svona mikinn hávaða áður, hrossin sturluðust úr hræðslu enda hlupu þau út um allt og vissu ekki hvaðan á sig stóð veðrið. Eitt hrossið hljóp á girðingu og stórslasaðist með þeim afleiðingum að dýralæknir þurfti að fella það á staðnum. Ég hvet bændur og búalið að passa vel upp á skepnurnar sínar þegar svona mikið gengur á í háloftunum“, segir Nína.
Kanna hvaða vél um ræðir
Ásgeir Erlendsson, upplýsingafulltrúi hjá Landhelgisgæslunni, segir starfsmenn Gæslunnar nú kanna hvað hafi gerst og hvaða flugvél hafi verið á ferðinni.
„En það er alveg ljóst að þetta voru ekki herflugvélar í loftrýmisgæslu því þær fóru allar af landi brott á fimmtudaginn“, segir Ásgeir.
Fjárhagslegt tjón
Nína og eiginmaður hennar, Aron Óskarsson eru með um þrjátíu útigangshross í Grímsnesi, mikið af verðlaunahrossum.
„Merin sem þurfti að aflífa heitir Sviða frá Firði, sex vetra mjög vel ættuð. Það er mikið fjárhagslegt tjón fyrir okkur að hafa misst hana vegna hávaða frá þotum, ég skil ekki hvernig svona hlutir geta gerst í skjóli nætur, það verður að vara fólk við og láta vita fyrir fram af svona flugi“, segir Nína.
