Lögreglan á höfuðborgarsvæðinu veitti í nótt ökumanni bifreiðar eftirför úr Skeifunni og niður í Fossvog. Maðurinn er grunaður um að hafa verið undir áhrifum fíkniefna.
Í dagbók lögreglu segir að lögreglumenn hafi ætlað að stöðva ökumanninn í Skeifunni en hann sinnti ekki stöðvunarmerkjum og jók hraðann. Manninum var því veitt eftirför, sem lauk í Fossvogi. Þar komst ökumaðurinn úr bifreiðinni en var handtekinn síðar.
Maðurinn er grunaður um akstur undir áhrifum fíkniefna og vörslu slíkra efna. Hann var vistaður í fangageymslu vegna rannsóknar málsins.
Önnur verkefni lögreglu í gær og í nótt voru af ýmsum toga. Klukkan 19:27 var tilkynnt um innbrot í miðborg Reykjavíkur. Þar hafði maður brotið rúðu í hurð, farið inn og stolið áfengisflöskum. Maðurinn var handtekinn skömmu síðar og vistaður í fangageymslu.
Þá var maður handtekinn í miðbænum klukkan 20 í gærkvöldi grunaður um bruggun áfengis. Maðurinn var látinn laus að lokinni skýrslutöku en áfengið og bruggtæki voru gerð upptæk.
Tilkynnt var um innbrot í Kópavogi á níunda tímanum. Sá sem þar var að verki hafði farið inn um glugga en ekki er vitað hverju var stolið.
Skömmu fyrir klukkan 22 í gærkvöldi var maður í annarlegu ástandi handtekinn á bílastæði við sjúkrastofnun í Fossvogi þar sem hann var búinn að brjóta rúður í þremur bifreiðum. Maðurinn var vistaður í fangageymslu.
Um klukkutíma síðar var tilkynnt um bílveltu á mörkum Laugardals og Árbæjar. Engin slys urðu á fólki en tveir menn voru handteknir grunaðir um akstur bifreiðar undir áhrifum áfengis og fíkniefna. Þá höfðu þeir aldrei öðlast ökuréttindi. Mennirnir voru vistaðir í fangageymslu lögreglu.
Leicester City
Manchester Utd
