„Ég þarf að róa mig niður áður en ég tala um æfingabúðirnar því ég er svo ánægður með þær,“ sagði Króatinn kátur en hann var sjálfur öflugur bardagakappi og barðist hjá Bellator bardagasambandinu áður en hann hætti.
„Gunni hefur lagt hrikalega mikið á sig og það hefur allt gengið upp í æfingabúðunum. Hann er alltaf að sækja sér meiri þekkingu og eflast. Hann æfði 2-3 á dag og það segir mikið um hversu mikið hann var til í að leggja á sig. Það er mjög ánægjulegt að sjá líkamlegt og andlegt ástand hans fyrir þennan bardaga.“
Margir eru á því að Burns henti Gunnari ekki vel en Jelcic er ekki sammála.
„Mér líður eins og Gunni henti Burns illa. Burns er með svipaðan skrokk og Thiago Alves og þeir eru svipaðir bardagakappar,“ sagði Luka og fór í að bera Burns og Alves frekar saman.
Það pæla margir í því hvernig bardagi þetta verði en Gunnar verður klár í það sem kemur.
„Við erum tilbúnir í allt. Ég sé þá fara í gólfið en hversu mikið veit ég ekki. Er svona sterkir glímukappar mætast þá verður bardaginn oft mikið standandi. Burns byrjar sterkt en svo minnkar orkan,“ segir Luka en Gunnar hefur fengið að æfa hjá Jorge Blanco til þess að undirbúa boxið betur. Sá er þekktur og virtur í bransanum enda þjálfað menn eins og Georges St-Pierre.
„Við æfðum meira en þrisvar sinnum meira en venjulega. Hann var mikið að æfa boxið og Blanco var með honum í Írlandi. Það var gott að fá heimsklassamann eins og hann með okkur. Hann gat gefið Gunna góð ráð og ég geri svo mitt besta. Blanco hefur unnið með GSP og veit hvað hann talar um.“
Bardagi Gunnars og Gilbert Burns fer fram næstkomandi laugardagskvöld á besta tíma í beinni á Stöð 2 Sport.
