Ný íslensk CrossFit stjarna: Jóhanna Júlía í öðru sæti í 21.1

Suðurnesin misstu út glæsilegan fulltrúa í opna hluta heimsleikanna í CrossFit þegar Sara Sigmundsdóttir sleit krossband nokkrum dögum áður en að tímabilið hófst. Önnur suðurnesjamær tók hins vegar upp hanskann fyrir Söru í fyrsta hlutanum.

Jóhanna Júlía Júlíusdóttir byrjaði Open frábærlega og náði öðrum besta árangrinum af öllum CrossFit konum heimsins. Það var aðeins hin norska Andrea Solberg sem gerði betur.

Jóhanna Júlía kláraði æfinguna á 11 mínútum og 2 sekúndum en Solberg var tólf sekúndum á undan henni. Þriðja var síðan hin bandaríska Danielle Brandon, þremur sekúndum á eftir Jóhönnu.

Jóhanna Júlía er greinilega í frábæru formi í ár en hún tryggði sér sigur í CrossFit keppni Reykjavíkurleikanna í janúarmánuði.

Jóhanna Júlía var sem dæmi næstum því einni og hálfri mínútu á undan Katrínu Tönju Davíðsdóttur sem kláraði á 12:30 og endaði í 29. sæti. Þuríður Erla Helgadóttir var síðan í 31. sæti á 12:39. Anníe Mist Þórisdóttir varð í 668. sæti í fyrsta hlutanum.

Björgvin Karl Guðmundsson varð efstur af íslensku strákunum en hann kláraði æfinguna á 11 mínútum og 47 sekúndum sem skilaði honum í fjórtánda sætið. Argentínumaðurinn Felipe Costa kláraði fyrstur á 10:54. Ingimar Jónsson varð næstur Íslendinga á eftir BKG en hann endaði í 40. sæti á 12:31.