Hættir sem forsætisráðherra og formaður

Kristín Ólafsdóttir skrifar 22. ágúst 2021 11:06

Stefan Löfven hefur gegnt embætti forsætisráðherra Svíþjóðar frá árinu 2014. EPA

Stefan Löfven forsætisráðherra Svíþjóðar hyggst segja af sér embætti sem forsætisráðherra og sem formaður Jafnaðarmannaflokksins í haust. Þetta tilkynnti Löfven í ávarpi nú fyrir hádegi.

Afsögn Löfvens tekur formlega gildi á landsfundi Jafnaðarmannaflokksins í nóvember. Hann segir að með því að tilkynna hana með svo miklum fyrirvara gefi hann arftaka sínum góðan tíma til undirbúnings. Þá kveðst hann viss um að nýr leiðtogi Jafnaðarmanna veiti flokknum nauðsynlegan drifkraft til stórræða.

Löfven hefur verið forsætisráðherra Svíþjóðar síðan í október 2014. Ríkisstjórn hans féll í júní síðastliðnum eftir að vantrauststillaga á hendur honum var samþykkt á sænska þinginu. Það var í fyrsta sinn í sænskri sögu sem vantrausti er lýst á forsætisráðherra landsins. Löfven fékk þó aftur umboð til stjórnarmyndunar og tók aftur við embætti í júlí.

Fréttin hefur verið uppfærð.

Svíþjóð

Tengdar fréttir

Sænska þingið gefur grænt ljós á nýja stjórn Löfvens

Meirihluti sænska þingsins samþykkti í hádeginu tillögu þingforsetans um að Stefan Löfven verði áfram forsætisráðherra landsins.

7. júlí 2021 13:02

Gefur Löfven tækifæri til að mynda nýja stjórn

Andreas Norlén, forseti sænska þingsins, hefur veitt Stefan Löfven, starfandi forsætisráðherra Svíþjóðar, umboð til að mynda nýja stjórn.

1. júlí 2021 10:41

Kannar hver á mestan möguleika að mynda nýja stjórn

Forseti sænska þingsins, Andreas Norlén, mun í dag ræða við leiðtoga allra þeirra flokka sem sæti eiga á sænska þinginu til að kanna hver á mestan möguleika að mynda nýja stjórn. Hann mun í kjölfarið veita einhverjum þeirra umboð til stjórnarmyndunar.

29. júní 2021 07:54