Manchester United vann öruggan 3-0 sigur er liðið tók á móti FC Sheriff í Evrópudeildinni í knattspyrnu í kvöld. Sigurinn þýðir að liðið er öruggt með sæti í útsláttarkeppni Evrópudeildarinnar og mætir Real Sociedad í hreinum úrslitaleik um efsta sæti E-riðils.
Diogo Dalot kom liðinu yfir á 44. mínútu leiksins eftir stoðsendingu frá Christian Eriksen og staðan var því 1-0 þegar liðin gengu til búningsherbergja.
Það var svo varamaðurinn Marcus Rashford sem tvöfaldaði forystu liðsins með marki á 65. mínútu áður en Cristiano Ronaldo gerði endanlega út um leikinn tæpum tíu mínútum fyrir leikslok.
Niðurstaðan því öruggur 3-0 sigur United og liðið er með 12 stig í öðru sæti E-riðils þegar ein umferð er eftir. United er þremur stigum á eftir toppliði Real Sociedad, en liðin mætast í lokaumferðinni að viku liðinni í hreinum úrslitaleik um efsta sæti riðilsins.
A good night's work! 💼#MUFC || #UEL
— Manchester United (@ManUtd) October 27, 2022
Þá vann Roma einnig lífsnauðsynlegan 1-2 útisigur er liðið heimsótti HJK Helsinki á sama tíma. Roma situr nú í þriðja sæti C-riðils með sjö stig, líkt og Ludogorets Razgrad, en liðin mætast í lokaumferðinni í úrslitaleik um sæti í útsláttarkeppninni.
Úrslit kvöldsins
C-riðill
HJK Helsinki 1-2 Roma
E-riðill
Manchester United 3-0 FC Sheriff
Omonia Nicosia 0-2 Real Sociedad
F-riðill
Sturm Graz 1-0 Feyenoord
G-riðill
Freiburg 1-1 Olympiacos
Nantes 2-1 Qarabag FK
H-riðill
Ferencváros 1-1 Monaco
Rauða Stjarnan 2-1 Trabzonspor