Að þessu sinni var um að ræða skjálfta upp á 6,3 stig og reið hann yfir um klukkan hálftvö í nótt að íslenskum tíma. Hann átti upptök sín um 28 kílómetra norður af borginni Herat. Fyrstu fregnir herma að rúmlega hundrað hafi slasast í hamförunum en ástandið er þó enn mjög óljóst.
Þó er talin bót í máli að fjöldi fólks svaf úti undir berum himni eftir að heimili þeirra höfðu laskast í skjálftunum á dögunum.
Hjálparsamtök segja neyðina á svæðinu mikla, skortur sé á matvælum og hlýjum teppum. Jarðskjálftar eru algengir í Afganistan, sérstaklega á fjallasvæðinu Hindu Kush.
