Stór jarðskjálfti reið yfir norðurhluta Bárðarbungu klukkan 22:19 í kvöld. Að sögn Einars Hjörleifssonar, jarðfræðings hjá Veðurstofunni mældist hann 4,9 að stærð.
Einar segir að skjálftinn sé stór en keimlíkur þeim stóru sem áður hafi fundist í Bárðarbungu á þessu ári. Einn mældist þar þann 4. október síðastliðinn og annar í febrúar.
Veðurstofu hafa ekki borist tilkynningar um að skjálftinn hafi fundist í byggð. Upptökin séu enda langt uppi á hálendi.
Fréttin hefur verið uppfærð.
Nokkuð stór skjálfti varð í dag við Bárðarbungu. Á vef Veðurstofu Íslands segir að hann hafi átt sér stað um það bil tíu mínútur yfir fjögur í dag.
