Ekki er vitað hversu margir gerendur voru að verki þegar pilti var ógnað með hnífi við Laugardalslaug í gær. Tilkynnt var um atvikið um hálftíma eftir að það átti sér stað og talið er að aðrir piltar hafi verið að verki.
Þetta segir Þóra Jónasdóttir aðstoðaryfirlögregluþjónn á höfuðborgarsvæðinu í samtali við fréttastofu. Enginn slasaðist og engar kærur liggja fyrir í málinu.
Því sé þó alltaf tekið alvarlega þegar ógnandi tilburðir sem þessir eru viðhafðir. Atvikið hafi átt sér stað utandyra, við sundlaugina.
Lögreglunni var í gær tilkynnt um einstaklinga sem veittust að öðrum manni með hníf í sundlaug á höfuðborgarsvæðinu. Enginn slasaðist vegna málsins sem er nú í rannsókn hjá lögreglu.
