Atlético Madrid sló Inter út í vítakeppni

Atlético tryggði sig áfram í keppninni með því að vinna ítalska toppliðið Internazionale 3-2 í vítaspyrnukeppni. Annað kvöldið í röð réðust úrslitin því í vítakeppni en Arsenal sló Porto út á þriðjudagskvöldið.

Að þessu sinni var það Jan Oblak, markvörður Atlético, sem var hetjan en hann varði tvö víti frá Ítölunum. Úrslitin réðust samt þegar Lautaro Martinez skaut framhjá úr lokavíti Inter liðsins.

Oblak varði víti frá þeim Alexis Sánchez og Davy Klaassen en Hakan Calhanoglu og Francesco Acerbi skoruðu úr sínum vítum.

Yann Sommer varði víti Saul Niguez en Atletico mennirnir Memphis Depay, Rodrigo Riquelme og Ángel Correa skoruðu úr sínum vítum. Þar sem Martinez klúðraði lokavíti Inter þurfti spænska liðið ekki að taka síðustu spyrnu sína.

Atletico Madrid vann leikinn 2-1 en þá var staðan 2-2 samlagt þar sem Inter vann fyrri leikinn 1-0 á heimavelli.

Federico Dimarco kom Internazionale í 1-0 á 33. mínútu eftir frábæra sókn og stoðsendingu frá Nicolo Barella. Internazionale vann fyrri leikinn og var því komið 2-0 yfir.

Útlitið var bjart en Inter menn héldu forystunni ekki lengi því Antoine Griezmann nýtti sér varnarmistök þeirra og jafnaði metin tveimur mínútum síðar.

Það vantaði ekki fjörið og færin í leiknum sem var mjög opinn og skemmtilegur.

Heimamenn í Atletico Madrid þurftu annað mark og þeir sóttu hart að marki ítalska liðsins í seinni hálfleiknum.

Madridarliðið hótaði marki þegar Memphis Depay skaut í stöngin á 85. mínútu og aðeins tveimur mínútum síðar kom Hollendingurinn boltanum síðan í markið.

Koke vann Depay í teignum og hann snéri sér laglega og skoraði. 2-1 yfir og jafnt 2-2 samanlagt.

Rodrigo Riquelme fékk frábært færi til að tryggja Atletico áfram í uppbótartímanum en skaut yfir markið.

Það varð því að framlengja leikinn. Ekkert var skorað í framlengingunni og því réðust úrslitin í vítakeppni.