Þórir og Ingunn hafa miklu reynslu á þessu sviði. Þau komu að stofnun Livio á Íslandi og störfuðu þar bæði. Ingunn sem læknir og eigandi og Þórir sem yfirmaður rannsóknarstofunnar. Þau hafa starfað við frjósemislækningar á Íslandi og Svíþjóð.
„Gaman að tilkynna það að við erum að fara að opna nýja frjósemismiðstöð á haustmánuðum sem hefur fengið nafnið Sunna. Í því sambandi þá höfum við lagt út þrjár atvinnuauglýsingar á Alfred.is og vonumst að sjálfsögðu að margt gott fólk hafi áhuga á að sækja um hjá okkur og hjálpa við að byggja upp góðan vinnustað saman,“ sagði Þórir í færslu sem hann birti í dag um miðstöðina á Facebook-síðu sinni.
Á Alfreð er nú auglýst eftir móttökufulltrúa, ljósmóðir/hjúkrunarfræðingi og kvensjúkdóma- og fæðingarlækni. Fyrirtækið er í eigu Ingunnar og Þóris en Ósar ehf. Munu koma til með að veita þeim ýmsa stoðþjónustu eins og hvað varðar markaðsmál, vefsíðugerð og fjármál.
„Okkur hefur fundist þurfa samkeppni á þennan markað. Samkeppni með hagsmuni þeirra sem þurfa á þessari þjónustu að halda að leiðarljósi. Það þarf sárlega á samkeppni að halda. Þetta er líka okkar sérgrein og þetta er það sem okkur langar að vinna við. Að hjálpa fólki að eignast börn. Þetta er það tvennt sem liggur að baki,“ segir Þórir í samtali við fréttastofu um það af hverju þau vildu opna miðstöðina.
Þórir og Ingunn hafa menntað sig og starfað við frjósemislækningar um árabil. Hann segir þeim afar mikilvægt að nýta sína menntun og reynslu í að veita fólki góða og faglega þjónustu.
„Við ætlum í samkeppni við hitt fyrirtækið og reyna að gera okkur besta. Það hafa allir gott af samkeppni. Ég held að þörfin sé það mikil fyrir annan valmöguleika á Íslandi að fólk muni vilja koma og sjá hvort við getum veitt þeim góða þjónustu. Það verður gott þjónustustig og aðgengi. Við munum hafa það að leiðarljósi og við vorum að það sé pláss fyrir okkur til að gera góða hluti.“
Þórir segir að miðstöðin verði rekin í húsnæði að Urðarhvarfi 8. Unnið er að endurbótum á hæðinni en Þórir gerir ráð fyrir því að þau fái hana afhenta fljótlega eftir sumarið og geti hafið starfsemi.
„Um sama leyti getum við byrjað að taka á móti fólki,“ segir Þórir.
Spurður um verðskrána segir Þórir að hann geti ekki svarað því eins og stendur. Þau vinni að henni en að hún muni liggja fyrir þegar heimasíðan opnar.
Hvað varðar nafnið var Sunna eitthvað sem talaði til þeirra.
„Þetta er annað nafn á sólinni og von og okkur fannst það bjart og fallegt. Það er íslenskt og það talaði til okkar.“
