Nýja línan frá Barton Per­reira kynnt í Auganu

„Það var mjög góð stemning hjá okkur á þriðjudaginn og fjöldi gesta mættu,“ segir Bill Barton. „Boðið var upp á kampavín og léttar veitingar og fólk var duglegt að spyrja út í nýju línuna okkar sem ég var mjög ánægður með.“

Bill er búinn að vera lengi í gleraugnabransanum en hann stofnaði Barton Perreira ásamt hönnuðinum Patty Perreira árið 2007. Áður var hann forstjóri gleraugnaframleiðandans Oliver Peoples, sem síðar var selt til Oakley. Á síðasta ári gerðust þau stórtíðindi að tískuvörurisinn LVMH, sem er með vörumerkin Louis Vuitton, Moet&Chandon, Dior, Hennessy, Marc Jabobs og fleiri keypti Barton Perreira, sem þykir einsdæmi í sögu LVMH.

Áhersla lögð á sjálfbærni í framleiðsluferlinu

Óvenju mikil vinna og natni er lögð í gleraugnaumgjarðir Barton Perreira eða allt að 100-120 klukkustundir. „Þessi langi framleiðslutími skýrist af því að við erum ekki í hefðbundinni fjöldaframleiðslu heldur framleiðum við hverja týpu í litlu magni. Auk þess leggjum við mjög mikla áherslu á sjálfbærni í framleiðsluferlinu. Efnið í umgjörðunum er sem dæmi unnið úr bómull og við og er fyrsta flokks enda framleitt í Japan þar sem öll gleraugun okkar eru framleidd í samvinnu við trausta aðila þar í landi. Þessar umgjarðir eru framleiddar til að endast en ég á vini sem hafa gengið með umgjarðir frá okkur í fimmtán ár. Það segir ýmislegt um útlit þeirra og gæði. Fólk á falleg jakkaföt og kjóla í mjög langan tíma, það sama ætti að gilda um fallegar og vandaðar gleraugnaumgjarðir.“ 

Hugað er að öllum smáatriðum í hönnun umgjarðanna, áferðin er mjúk og gleraugun sitja mjög vel í andliti.

Gjöful samstarfsverkefni

Barton Perreira fer árlega í samstarf við ýmsa listamenn og hönnuði í heimabyggð. „Við eigum í mjög góðu og persónulegu samstarfi við þá sem hafa gefið af sér ýmsa skemmtilega hluti, til dæmis gleraugnaklútana sem innihalda myndir af listaverkum frá ólíkum hönnuðum og listafólki. Þess má geta að allir gleraugnaklútar frá okkur eru unnir úr endurunnum plastflöskum. Þessi samvinna okkar hefur gengið vel hingað til og ég sé hana bara vaxa áfram á næstu árum sem mun gefa okkur fleiri umhverfisvænar og fallegar gleraugnavörur.“

Annað áhugavert verkefni sem Barton Perreira tekur þátt í er The Women Colation en það snýst um samstarf við konur sem hafa getið sér góðs orðspors í listum og hönnun og hafa vakið athygli fyrir verkefni sín. „Þetta verkefni stendur mér mjög nærri enda á ég frábæra móður og systur með glæsilegan starfsferil. Patty, meðstofnandi minn, er líka fædd inn í stóra fjölskyldu og þegar við stofnuðum fyrirtækið fannst okkur einfaldlega rétti tíminn til að kynna betur verk ýmissa kvenna.“

The Women Colation hefur m.a. gefið af sér gleraugnalínur í samstarfi við Sarah Hoover, Kelley Baker og Keerin Rose. „Í þessu samstarfi vekjum við athygli á flottum kvenfyrirmyndum, leggjum áherslu á jafnrétti kynjanna og reynum ekki síst að veita öðrum konum innblástur. Ég er mjög stoltur af þessu samstarfi en svona hefur aldrei verið gert áður í þessu geira.“

„Gerum eitthvað saman, ég og þú“

Bill og Patty störfuðu saman hjá Oliver Peoples þar til fyrirtækið var selt. Patty starfaði þó áfram þar í einhvern tíma eða þar til hún hringdi í Bill og sagðist ekki vilja starfa þar áfram. „Gerum eitthvað saman, ég og þú,“ sagði hún við Bill og stuttu síðar áttu þau fund á írskum pöbb. „Við byrjuðum strax að kasta á milli okkar hugmyndum og urðum fljótt mjög náin. Samband okkar hefur verið frábært frá upphafi og við erum svo sannarlega stolt af gleraugnalínum sem við höfum sett á markað síðustu ár. Ein þeirra er til dæmis „No Time To Die“ línan sem kom í takmörkuðu upplagi og var hönnuð fyrir nýjustu James Bond myndina sem kom út 2021.“

Aðspurður hvaða nýju vörur eru væntanlegar á næstu 1-2 árum segir Bill að Barton Perreira stundi frekar að þróa þær vörur sem eru til staðar, frekar en að vera stöðugt að koma út með nýjungar. „Við bætum við 5-6 litum á hverju tímabili sem dæmi og reynum almennt að þróa þær vörur sem við eigum til nú þegar í stað þess að vera stöðugt að setja á markað eitthvað glænýtt.“

Slíkur hugsunarháttur rímar vel við það fólk sem notar gleraugu frá Barton Perreira segir Bill. „Meðal viðskiptavina okkar eru fjölskyldur sem hafa keypt umgjarðir hjá okkur frá því við stofnuðum fyrirtækið. Viðskiptavinir okkar vilja vörur sem eru sérstakar og lifa í langan tíma. Ég segi alltaf, að það er vel hægt að kaupa ódýrari gleraugu en hjá okkur og það er í góðu lagi fyrir sumt fólk. En ef þú vilt gæði sem lifa í langan tíma, þá mæli ég með umgjörðum frá okkur.“