Fótbolti

Karó­lína skoraði stór­kost­legt mark og lagði annað upp

Ágúst Orri Arnarson skrifar
Karólína Lea Vilhjálmsdóttir gegnir stóru hlutverki í liði Leverkusen sem berst um þýska meistaratitilinn.
Karólína Lea Vilhjálmsdóttir gegnir stóru hlutverki í liði Leverkusen sem berst um þýska meistaratitilinn. Getty/Inaki Esnaola

Karólína Lea Vilhjálmsdóttir skoraði glæsilegt mark fyrir Bayer Leverkusen og lagði upp annað í 3-2 tapi á útivelli gegn Eintracht Frankfurt í toppslag þýsku úrvalsdeildarinnar.

Markmaðurinn Stina Johannes lagði markið upp með langri sendingu upp völlinn á Karólínu, sem skaut af óralöngu færi og skoraði.

Mark Karólínu var 1-1 jöfnunarmark eftir Frankfurt tók forystuna af vítapunktinum.

Frankfurt komst aftur yfir aðeins tveimur mínútum síðar. Leverkusen jafnaði svo í 2-2 í upphafi seinni hálfleiks, Katharina Piljíc skoraði markið eftir hornspyrnu og stoðsendingu frá Karólínu.

En aftur, aðeins tveimur mínútum síðar, tókst Frankfurt að taka forystuna á ný. Leverkusen átti ekki annað jöfnunarmark og lokatölur urðu 3-2.

Um var að ræða toppslag, liðin tvö ásamt Bayern Munchen voru jöfn með 29 stig fyrir leik. Frankfurt fer því í efsta sætið eftir sigurinn, með þriggja stiga forystu en Bayern á leik á sunnudaginn gegn Leipzig.

Þýski boltinn

Mest lesið


Fleiri fréttir

Sjá meira


×

Mest lesið